Charter Document - 05080001

Je Willaumes d'Arbois cheualiers dit Bruns fais sauoir à touz ceus qui verront et orront ces lettres que j'ay vendu otroié quité et deliuré parmaingnablement pour moy et pour mes hoirs à Othenin fils ça en arrière Jacque baillif d'Arbois dit le François le chasal et la maison qui est assise à Arbois ou lieu que on dit en Mont Fort et touche de l'une part au courtil Jaquier dit de Vilera si dure jucques a la clooson des murs d'Arbois et de l'autre partie dès les diz murs jusques enmi les deus fosses par où li aigue soloit courre ça en arriers pour quatre vins liures de viannois des quelles je me tiens pour bien paié de luy et les ay reçeus et eus deu dit Othenin en bonne monnoie et loialment nombrée Et pour ce je me sui desuestuz pour moy et pour les miens doudit chasal et de la maison et en ay enuestu le dit Othenin pour luy et pour ses hoirs et mis en possession sanz retenir à moy an iceli droit ne fie ne cens ne seignourie ne vsage ne juridiction quelconque elle soit et ay promis et promet pour moy et pour mes hoirs par stipulacion sollempnel par mon serement fait sur l'euuangile et sus l'obligacion de touz mes biens meubles et non meubles présens et auenir où qu'il soient que je ne venray ne feray ne consentiray à venir en jugement ne dehors par moy ne par autrui contre ceste vendue ains la promet et sui tenuz de garantir au dit Othenin en touz lieus et contre touz hommes et à ce obligay principaument et espécialment moy et mes hoirs et mes biens et les biens de mes hoirs pour le serement et pour l'obligacion dessus ditte de touz mes biens Et ay renoncié en cest fait par mon deuant dit serement et sus l'obligacion dessus deuisée à toute excepcion de barat de paour et en fait de condiction sanz cause ou au moins droitte cause de chose vendue a menour pris ou mains de la moitié de son droit pris et à toute aide de droit ou de fait ou de coustume ou d'usage que on porroit mettre contre cest fait ou dire contre ceste lettre espécialment au droit qui dit que générauls renonciacion ne vaut Ou tesmoing de quoy j'ay proié a religieuses personnes Aubery abbé de Rosiers de l'ordre de Cisteaus et Jehans prieurs d'Arbois de l'ordre Saint Benoit de la dyocèse de Besençon qu'il mettent lour seaus en ces lettres Et nos dessus dit Auberiz abbés de Rosières et Jehans prieurs d'Arbois à la requeste doudit Guillaume le Brun qui a promis par son serement fait deuant nous sus l'euuangille garder et poursuivre la teneur de ces lettres auons mis noz seaux en ces lettres pendanz Faittes le lundi après les vuitienes de la Saint Michel l'an courant par mil cc sexante et treze ou mois de octobre