Charter Document - 05060107
| Charter Number: | 05060107 |
|---|---|
| Cartulary Title: | Acts of Waleran II, Count of Meulan and Worcester, 1104-1166 |
| Charter Language: | Latin |
| Charter Origin: | Religious |
| Charter Type(s): | Declaration |
| Date: | 1154 - 1155 |
| Date type: | Internal, A.D., Papal, Regnal |
| Resource Link(s): |
SCRIPTA - Base des actes normands médiévaux |
Charter:
Christiana religio ad laudem et gloriam nominis Christi quicquid in presenti ecclesia agit ideo fit ut ab eo remuneretur in celo Huius incola felix anima est cuius vita summa beatitudo est Ob hanc igitur adipiscendam ego Gualerannus dei gratia comes Mellenti et amator religionis in possessione mea propria que vulgo Wateuilla nuncupatur ante fores mei castri in honore perpetue virginis Marie quandam capellam construxi et quia mater ecclesia videlicet beati Martini cum tota decima agrorum pecudemque domesticorum et oblationibus altaris pretaxate ville necnon etiam omni ferarum et reddituum de foresta comitis que dicitur Brotonia collata ab antiquo deo et sancto Wandregisilo Fontanellensis cenobii fuerat monachis eiusdem loci edificium capelle noue in futuro visum est nociturum et ne vel versucia diabolice fraudis vel studio humane calliditatis fratres hac de causa aut a nobis impugnarentur aut a successoribus nostris deprimerentur prouidente domno archiepiscopo Hugone venerabilis vite et Rogero abbate predicti cenobii et me assentiente una nostris cum hominibus decreuimus ac statuimus ut quemadmodum una parrochia esse dinoscitur ita unus sacerdos utrique et matri ecclesie scilicet et supposite capele deseruiat Iura vero capitalia ad honorem matris ecclesie reseruari censuimus sepulturam videlicet defunctorum et utriusque sexus desponsalia et mulierum purificationes et honorem paschalis cerei et baptisterium excepto timore mortis Quicquid autem a nobis seu successoribus nostris vel ab eorumdem familiis siue superuiuentibus domino deo in supradicta capella oblatum fuerit monachi et presbiter vicarius eorum absque capellanorum partitione ex integro habeant et possideant Ut autem hec conuentio tam nostris temporibus quam nostrorum successorum rata et inconcussa permaneat suppositione nostri sigilli et nostrorum hominum attestatione cartam presentem signauimus et subscriptione Agnetis uxoris mee et filiorum eorum Roberti et Waleranni Ego Walerannus subscripsi Ego Robertus subscripsi Ego Willelmus de Pino Ego Adam Ego Rad[ulfus] de Mannauilla Actum est hoc anno verbi incarnati MCLIIII Adriani pape anno i Henrici uero regis secundi Anglorum et ducis Normannorum et Aquitannorum et comitis Andegauorum anno regni eius i