Charter Document - 05048070

Comme procès fust meu en la court de parlement en cas de saisine et de nouvelleté entre les religieux abbé et couvent des Vaulx de Cernay demandeurs et complaignans d'une part et les religieux abbé et couvent de Sainct Denis en France opposans d'autre part sur ce que lesdiz demandeurs disoient estre en possession et saisine de certains estangs ou viviers assis jongnant de leur église de les faire pescher et appliquer les poissons à leur prouffit et que néantmoins ledit monsieur l'abbé de Sainct Denys et ses gens avoient de fait pesché en l'un desdiz estangs prins et emporté grant foison de poissons jusques à la valeur de deux cens cinquante livres ou environ en troublant et empeschant lesdiz demandeurs en leurs dictes possessions et saisines indeuement et de nouvel lesdiz de Sainct Denys disans qu'il estoient en possession et saisine que toutesfoiz que ledit monsieur l'abbé de Sainct Denis aloit en leur hostel de Valances ou en aucun de leurs autres hostelz près des lieux dessusdiz il povoit faire pescher et prendre des poissons és estangs dessusdiz et en ce se disoient estre lesdiz de Sainct Denys fondés par lettres et tiltres desdiz des Vaulx de Cernay et que en usant desdictes possessions et saisines ledit monsieur l'abbé de Sainct Denys qui estoit alez en un de ses diz hostelz avoit faict pescher deuement ésdiz estangs finablement pour bien de paix actendu que ladicte pescherie est de très petit prouffit ou de nul auxdiz religieux de Sainct Denys est traictié et accordé entre lesdictes parties s'il plaist à la court en la manière qui s'ensuit C'est assavoir que oultre XXX sols de rente perpétuelle que lesdiz religieux de Sainct Denis ont acoustumé de prendre chascun an terme de la feste sainct Andrieu sur ladicte église des Vaulx de Cernay pour raison de l'admortissement de certains bois et autres héritaiges qui piéça furent donnez par le sire de Chevreuse à ladicte église des Vaulx de Cernay et pour autres causes lesdiz religieux des Vaulx de Cernay paieront chascun an doresnavant ausdiz religieux de Sainct Denys audit terme de la feste sainct Andrieu XX solz parisis qui feront en somme toute cinquante solz parisis de rente paiés en leur hostel de Beauraim Et parmy ce lesdiz des Vaulx de Cernay et leurs diz estangs demourront quictes perpétuelment de ladicte pescherie sauf auxdiz de Sainct Denys leurs autres droitz