Charter Document - 05041058

A touz ceus qui ces lettres verront Jehan de Soisy prévost de Chastiaufort salut Sachent tuit que Jehannin le Peletier de Triarnon et Gilleite sa femme congnurent avoir vendu baillé cessé transporté et délessié à Robin Rémy de Verssailles et à Jehanne sa fame les héritages ci dessouz nommez c'est à savoir une maison et toutes ses appartenances tenent d'une part à Philippot de Saitourry et d'autre part à Gillot Gresillon mouvant dudit Philippot à sis deniers de cens par an paiez à la saint Remy et telle chose comme elle puet devoir pour la coustume des bois derechief deus arpenz de terre tenant d'une part à monsieur Jehan de Verssailles chevalier et d'autre part au curé de Verssailles mouvant dudit Philippot à douze deniers parisis de cens par an paiez à la saint Remy derechief un arpent de terre tenent audit chevalier d'une part et aus devant diz arpenz d'autre part mouvenz du prieur de Versailles à quatre deniers parisis de cens par an paiez à la saint Remy c'est à savoir tout pour le pris de trente livres parisis [] En tesmoing de ce nous avons fait seeller ces lettres du seel de la prévosté de Chastiaufort Donné l'an de grace mil trois cenz quarante trois le dymanche après la saint Jaques et saint Christofle