Charter Document - 05041057

A touz ceuls qui ces présentes lettres verront Guillaume Gormont garde de la prévosté de Paris salut Savoir faisons que Guillaume dit Villain clerc né de Villepereur demorant à présent à Boigneville recognut pardevant nous que pour la bonne et grant affection et dévocion que il a eu ou temps passé et ancorres a à l'église des Vaux de Cernay et à religieuses personnes et honnestes l'abbé et le couvent de la dicte église des Vaux de Cernay pour estre participant et acompaignié aus prières et bienfaiz qui faiz sont et seront en ladicte église il avoit donné transporté et délessié ausdiz abbé et couvent de laditte église des Vaux de Cernay touz les héritaiges et possessions quelxconques que icelui Guillaume Villain avoit tenoit et possédoit en la ville et parroiche d'Ermenoville lés Galardon et au terrouer et és appartenances d'icelle ville et parroiche d'Ermenoville tout un herbergement et toutes ses appartenances et appendances qui fu jadiz monsieur Guillaume Augier prestre comme autres héritaiges que ledit Guillaume Villain avoit audit lieu d'Ermenoville et illec environ [] En tesmoing de ce nous à sa requeste avons mis en ces lettres le seel de ladite prévosté de Paris Donné l'an de grace mil CCC quarante deux le mercredi jour de feste saint Mor et saint Lon