Charter Document - 05041053
| Charter Number: | 05041053 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Religious |
| Charter Type(s): | Concession |
| Date: | 1333 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Universis presentes litteras inspecturis G[uillelmus] Dei permissione Carnotensis ecclesie minister humilis in Domino salutem Noverit universitas vestra quod Theobaldus de Dinisiaco miles dominus de Bolonno de voluntate et consensu Philippe uxoris sue voluit et in perpetuum confirmavit ut viri religiosi abbas et conventus Vallium Sarnaii teneant pacifice et libere donum quod fecit eis Alexander quondam dominus de Longa Quercu miles videlicet decimam campipartem et omnia alia que quondam bone memorie sui predecessores predictorum domini capitales confirmaverunt religiosis predictis que campipars debetur a cultoribus terrarum totius territorii Longe Quercus quocumque dictum territorium loco se extendit videlicet duodecimam garbam omnium granorum suorum quam debent predicti cultores ducere in grangiam dictorum religiosorum antequam suum proprium gainagium possent de campis levare sub emenda consueta in talibus et similiter domini Longe Quercus de propria agricultura sua debent campipartem in predictam grangiam ducere Preterea dictus miles approbavit et confirmavit illam totalem concessionem et quictationem quas per amicabilem compositionem cum dictis religiosis fecerunt Guido et Symon de Longa Quercu super grangia campiparte et decimis predictis cum omnibus pertinentiis ut in quadam littera quam predicti religiosi habent super predictis plenius continetur Qui etiam cultores predicti ex omnibus granis et gainagiis totius territorii predicti debent tradere et solvere undecimam garbam set predicti religiosi et domini Longe Quercus debent illam predictam undecimam garbam que pro decima solvitur a predictis cultoribus ut dictum est levare et ducere propriis expensis in grangiam predictam Voluit etiam predictus miles quod dicti religiosi teneant in manu mortua quamdam peciam prati quam dedit eis Johannes de Buviller sitam in praeria de Bolonno continentem circiter quinque quarteria prati contiguam ex una parte rocherie Johannis Boncorps de Bolonno et ex alia parte prato de Sancto Spiritu et ex aliis partibus dicto militi retento tamen censu suo undecim denariorum parisiensium solvendorum in festum beate Marie Virginis in marcio et hoc sine emenda [] In cujus rei memoriam et munimen et ad peticionem dicti militis sigilli nostri munimine roboravimus presens scriptum Actum anno ab incarnatione Domini millesimo trecentesimo trigesimo tertio