Charter Document - 05041046

Charter Document - 05041046


Charter Number: 05041046
Cartulary Title: Cartulaire de l'Abbaye de Notre-Dame des Vaux de Cernay
Charter Language: French
Charter Origin: Lay
Charter Type(s): Confirmation
Date: 1322
Date type: Internal, A.D., Feast
Resource Link(s): Cartulaires d'Île-de-France

Charter:

A touz ceus qui ces présentes lettres verront et orront je Jehan sires de Sarney chevalier salut en Nostre Seigneur Comme pluseurs bonnes genz aient requis les religieux des Vaux de Sarnoy que il abateissent leur fosseiz séenz emprès mon pont de Chanieux pour avoir la voie et le chemin communément pour eus laquele chose pourroit empescher ou temps avenir l'yaue venent à mon molin sachent touz que je weil et otroie que lesdiz religieus et toutes manières d'autres genz desores en avant aient voie et chemin pardessus mondit pont en alent et en venent à pié à cheval et à charrete en touz temps senz empechement de moy ne de mes hoirs et senz en faire aucune redevence à moy ne à mes hoirs ou temps avenir prometent [] En teigmoeing de laquelle chose je ai scellé ces présentes lettres de mon propre seel et je Mahaut dame de Sernoy fame dudit seigneur volent et otreent les choses dessusdictes ai mis pour le bien de paiz et pour le profit dudit molin mon propre seel en ces présentes lettres seellées l'an de grace mil trois cenz vint et deus le dimenche devant la feste saint Barnabé apostre