Charter Document - 05041044

Charter Document - 05041044


Charter Number: 05041044
Cartulary Title: Cartulaire de l'Abbaye de Notre-Dame des Vaux de Cernay
Charter Language: French
Charter Origin: Religious
Charter Type(s): Agreement
Date: 1321
Date type: Internal, A.D., Feast
Resource Link(s): Cartulaires d'Île-de-France

Charter:

A touz ceus qui ces lettres verront et orront le prieur de Sainte Katherine du Val des Escolliers de Paris salut en Nostre Seigneur Comme contens et descort feust meu entre monsieur Bérengier de Saint Martial moinne de Martelle en l'église Saint Victor procureur de religieux hommes et honestes le prieur et le couvent de Nostre Dame de Loncpont ou dyocèse de Paris d'une part et frère Gile d'Abluis procureur de religieux hommes et honestes l'abbé et le couvent de Nostre Dame des Vaus de Sarnay d'autre part pour cause d'une quantité de vin que lesdiz religieux de Loncpont disoient avoir chascun an en vendenges sus le pressouer du Foz qui est ausdiz religieux des Vaus de Sarnay duquel contens et descort lesdites parties ou non de eus et desdis religieux se estoient mis compromis et descenduz de haut et de bas en nous prieur de Sainte Katherine et sous nous comme arbitre arbitrateur ou amiable compositeur à prononcier dire ordener et sentencier à nostre plainne volenté à jour foirié ou non foirié à painne de dis livres parisis à paier de la partie désobéissant si comme il est plus plainement contenu és lettres du compromis faictes sur ce scellées du seel de la prévosté de Paris parmi lesqueles cestes présentes lettres sont annexées Sachent tuit que nous de l'autorité et du povoir à nous donné desdites parties deismes et prononçames disons et prononçons par nostre sentence et adjugons audit prieur et couvent de Nostre Dame de Loncpont que il aura et prendra em pes franchement sanz contredit desores en avant chascun an perpétuelement un mui de vin ou dit pressouer de Fos tel comme il li vendra et se il avenoit que audit pressoer de Fos il ne veinst point de vin riens ne peut ne ne pourra demander ledit prieur et couvent de Loncpont ausdiz religieux de Sarnay En tesmoing de laquele chose nous avons donné audit prieur et couvent de Loncpont ces présentes lettres seellées de nostre propre seel Ce fu fait l'an de grace mil trois cens vint et un le dimenche après la saint Denis