Charter Document - 05041026

Universis presentes litteras inspecturis frater Gerbertus permissione divina monasterii sancti Maglorii Parisiensis abbas humilis totusque ejusdem loci conventus eternam in Domino salutem Cum lis sive discordia verteretur inter nos ex una parte et religiosos viros abbatem et conventum de Vallibus Sarnaii ex altera super eo quod dicebamus nos habere et percipere annuatim in dictorum religiosorum granchia de Aita tres sextarios bladi et totidem avene insuper dicebamus nos percipere et levare decimas in pluribus terris dictorum religiosorum de Vallibus Sarnaii quas ipsis propriis manibus colebant et ad dictam granchiam de Ayta pertinentibus ipsis in contrarium dicentibus et etiam asserentibus de predictis omnibus que petebamus ipsos esse liberos penitus et immunes ad solutionem decimarum predictarum ratione privilegiorum suorum non teneri tandem propter bonum pacis et amicitie que inter nos religiosos solet et debet precipue refulgere communicato bonorum consilio et inter nos deliberatione prehabita diligenti et videntes utilitatem nostram et ecclesie nostre composuimus in hunc modum videlicet quod nos percipiemus et habebimus annuatim in dicta granchia de Aita in festo sancti Andree apostoli quinque sextarios et unam minam bladi et totidem avene ad mensuram Montis Fortis de illo blado et avena que in predictis terris creverint annuatim tali modo quod de dicta granchia de Aita et omnibus terris quas tempore confectionis presentium litterarum dicti religiosi de Vallibus Sarnaii habent ad dictam granchiam pertinentibus exceptis tribus arpentis que sunt de decima de Marolio pro predictis undecim sextariis tam bladi quam avene super solutione decimarum erunt de cetero quicti liberi penitus et immunes Et si aliquid in locis predictis tempore futuro dicti religiosi de Vallibus Sarnaii acquirent in quibus locis nos habemus decimas ipsi tenebuntur reddere et solvere decimas nobis ibidem consuetas nonobstante compositione predicta de novis acquisitis post datam presentium litterarum Et ne in posterum lis contentio seu controversia ratione predictarum rerum iterum renovetur predictis religiosis de Vallibus Sarnaii nostras litteras sigillis nostris quibus utimur dedimus sigillatas Datum et actum anno Domini millesimo trecentesimo nono die veneris post Purificationem Virginis gloriose