Charter Document - 05041015

A touz ceus qui ces lettres verront Jehan Fuiret garde du seel de la prévosté de Vernon salut Sachiez que par devant Pierre du Port clerc tabellion juré nostre sire le roy à Vernon fu présent Robert le Gous et recognut que comme hommes religieus l'abbé et le couvent des Vaus de Sarnay eussent acquis en son fié une acre de terre assise en la paroisse de Heubecourt entre lesdiz religieus d'une part et Guillaume Postel d'autre si comme elle se pourporte en lonc et en lé et ledit Robert eust amonestez lesdiz religieus que il meissent hors de leur main l'acre de terre dessusdite sur ce eu conseil diligent de ses amis pour le salu de s'ame et de ses antécesseurs ledit Robert vout et otroia par devant ledit clerc juré que lesdiz religieus aient et poursoient en perpétuité en main morte l'acre de terre dessusdite franchement quittement et em pez en leurs propres usages et de leur moutier sans ce que li ne ses hers les puissent pourforcier ne contraindre de vendre ne de mestre hors de leur main desoremez en avant pour vint et quatre soulz parisis que lesdiz religieus li ont donné de leur garde et de leur volenté [] Et obliga quant à ce soy et ses hers et touz ses biens muebles et non muebles présens et avenir à prendre et à vendre par la main de la justice et spécialement demie acre de terre assise en la dicte paroisse entre monsieur Hue de Villers chevalier d'une part et Pierres de Tourny d'autre pour tous les cous et les damages que lesdiz religieus ou leurs successeurs y pourroient avoir En tesmoing de laquele chose nous à la requeste desdites parties avons seellé ces lettres du seel de la prévosté de Vernon sauf le droit le roy et l'autrui Ce fu fet l'an de grace mil CCC et cinc le dyemanche devant Penthecouste