Charter Document - 05031856

En non dou Père et dou Fil et dou Saint Esperit amen Je Marguerite de Montfort contesse de Soissons en ma bonne mémoire et en bonne santé de mon cors fais devise et ordenne mon testament en ceste manière [] et sic terminatur in data Cis miens présens testamens fu fais et ordennés l'an de grace mil deus cens quatre vins et trois le mardi devant la sainte Katerine prout prima facie apparebat inter cetera in dicto testamento contenta duas clausulas vidisse contineri quarum tenor talis est [] Je lais pour Dieu et en aumosne as églises c'est assavoir de Vaus de Sarnai de Haut Bruière et de Grant Champ à chascune de ces abbiés quarante sous chascun an pour faire mon anniversaire à penre chascun an au travers de ma ville de Gambais et se li travers ne souffisoit à ce faire je wel com les prengne à mes avainnes de le Charmoie Je lais pour Dieu et en aumosne dis livres chascun an pour acheter coteles et soulers pour départir chascun an as poures de mes villes de la terre de Gambais par les wart l'abbet des Vaus de Sarnai l'abbé de Grant Champ et la persone de Saint Aignien à penre chascun an à mes moutons de Bourdein et se li mouton ne souffisoient à ce faire je veul com prengne le remanant à mes avainnes de Bourdein