Charter Document - 05030987

A tous ceus qui ces présentes lettres verront et orront Jehan Fuiret garde du seel de la prévosté de Vernon salut Sachent que par devant Jehen Goville clerc tabellion juré à Vernon à qui nous ajouston foi fu présent Jaques de Grey et recognut que il avoit donné et octroié as hommes religieus l'abbé et le couvent des Vaus de Sarnai en pure eschange sis pièces de terre si comme elles se pourportent en lonc et en lé assises c'est asavoir la première au Rondel entre la terre Robert du Bois d'une part et la terre as hoiers de Giencourt d'autre la seconde au Rondel entre la terre Robert Homfrei d'une part et la terre Robin de Giencourt d'autre et doivent ces deus pièces de terre desus dites deus souls de rente c'est asavoir sis deniers à Gacé sis deniers au prestre de Heubecourt et douze deniers as hoiers Thomas de la Queue d'Aez la tierce au Rondel franche entre la terre Pierres le Camus d'une part et la terre au mounier de Tylli d'autre la quarte au Buisson Refoulé entre la terre asdiz religieus d'une part et d'autre et est franche la quinte au chemin de Heubecourt entre la terre Phelippe Bouvenel d'une part et la terre à la fame Gillebert Goires d'autre par un tournois de rente et la sisième à Bresquebues entre la terre as diz religieux d'une part et la terre Jehen Latire d'autre Item demie acre de terre assise entre la terre asdiz religieux d'une part et la terre Pierres de Tourni d'autre par quatre deniers rendant à la Gonée le diemenche des Brandons item demie acre franche assise au bois Huon entre la terre au Camus d'une part et la terre as moines de Sauceuse d'autre item acre et demie au Rondel franche par un denier à Pierres de la Place à la seint Remi entre la terre Robin de Giencourt d'une part et la terre as hoiers Phelippe Bouvenel d'autre à tenir à avoir et à pourseer par droit héritage à tousjours perpétuaument les sis pièces de terre desus dites ovec les autres terres desus nommées as diz religieux et à lours successours franchement quitement et pesiblement sanz nulle réclamance dudit Jaques ou de ses hoiers à fere desoremes en avant pour une pièce de terre qui fu Gautier du Chastel assise en la paroisse de Tylli entre la terre as moines de Sauceuse d'une part et la terre as hoiers Baudri le Normant de l'autre et doit ladite pièce de terre as moines de Sauceuse douze deniers et au prestre de Corbie deus souls item pour une pièce de terre qui fu Nichole le Tailleeur assis en la paroisse de Tylli entre la terre as moines de Sauceuse d'une part et la terre Michiel le Peletier d'autre et est franche et quite item pour une pièce de terre qui fu Guillaume de la Barre et pour une autre pièce de terre qui fu Jehen Ohier et doivent ces deus pièces de terre deus deniers à la seint Remi à Perrot Piquet item pour une pièce de terre qui fu Denis Guion laquele doit un denier à Nichole le Tailleeur à la seint Remi lesqueles trois pièces de terre c'est assavoir dudit Guillaume de Jehen et de Denis Guion sunt assises ensemble en la paroisse de Tylli entre la terre Perrot Piquet d'une part et la terre Gautier du Chastel Nuef d'autre item pour une pièce de terre franche qui fu Richart le Charpentier assis en la parroisse de Tylli entre la terre as hoiers monseigneur Guillaume de Nuilli chevalier d'une part et la terre Pierres le Camus de l'autre et pour une pièce de terre assise vers le Moulinau Vent entre la terre audit Jaques d'une part et d'autre et pour une pièce de terre de feu Richeut fame Jehen le Normant assise entre la terre Phelippe de Boucleinville d'une part et la terre as hoiers Aden le Boscheton d'autre et doit sis tournois de rente à la seint Remi as hoiers Helies de Fleuri Et ledit Jaques et ses hoiers sunt tenuz les sis pièces de terre desus nommées et les autres pièces de terre desus dites as diz religieux et à lour successours contre toutes genz garentir deffendre et délivrer bien et leaument à tousjours En tesmoing de laquele chose nous avons mis le seel de la prévosté de Vernon à ces présentes lettres à la requeste des parties Ce fu fet l'en de grace mil et trois cenz le venredi après l'Ascension sauf le droit le roi et l'autrui Donné l'en et le jour desusdit