Charter Document - 05030980

A tous ceus qui ces présentes lettres verront et orront Gacé de la Queue d'Aez salu Comme Jaques de Grey ait eschangié et otroié as hommes religieus l'abbé et le couvent des Vaus de Sarnai deus pièces de terre lesqueles ledit Jaques tenoit de moi assises en Roondel en la paroisse de Heubecourt c'est assavoir la première entre la terre Robert du Bois d'une part et la terre as hoiers de Giencourt de l'autre et la seconde entre la terre Robert Amfrei d'une part et la terre Robin de Giencourt de l'autre Je faz assavoir à tous que je weil et otroi pour moi et pour mes hoiers que les diz religieus et leur successours tieingnent et poursuient à tous jours perpétuaument bien et em pes les deus pièces de terre desus dites de moi et de mes hoiers en tele manière que je ou mes hoiers ne puissons contreindre lesdiz religieus ne lours successours de mettre hors de lour mains les deus pièces de terre desus dites sauves les rentes teles et queles comme ledit Jaques me rendoit comme à chief seigneur et sauf autri droit lesqueles rentes lesdiz religieus et lours successours sunt tenuz à moi et à mes hoiers à paier ausi comme ledit Jaques les paoit comme à chief seigneur Et quant à ce tenir ferme et estable à tousjours sans james aler encontre je oblige moi et mes hoiers En tesmoing de laquele chose j'ai baillié asdiz religieus ces présentes lettres seelées de mon seel Ce fu fet l'en de grace mil CC quatre vinz dis et nuef le mardi après les octaves de la seint Nicholas en mai