Charter Document - 05030977

A touz ceuz qui ces lettres verront et orront Nicolas Gascoing clerc garde du seel de la prévosté de Vernon saluz Sachiez que par devant nous furent présenz Robin Loidart et Agnès sa fame de la paroisse de Héricourt si comme il disoient et recognurent que il avoient vendu quittié et délessié à touzjours par non de vente à hommes relegieus l'abbé et le couvent des Vaux de Sarnay demie acre de terre assise delez le Callouell entre Guillemin de la Fresnoye d'une part et Helies le Verdier d'autre pour chinquante souz parisis à tenir à avoir et à pourseer par droit héritage la vente dessus dite au diz relegieus et à leur successeurs franchement quitement et em pes par douze deniers parisis rendans chascun an à la Touz Sainz au prieur de Saint Ladre de Vernon sanz nulle réclamance desdiz vendeurs ou de leur hoirs à fere desoreenavant Et promistrent et jurèrent [] En tesmoing de laquele chose nous à la requeste des parties avon seelé ces lettres du seel de la prévosté de Vernon sauf le droit le roy et l'autrui Ce fut fet l'an de grace mil deuz cenz nonante et huit le lundi feste de la Nativité Nostre Dame Virge