Charter Document - 05030974

A touz ceus qui ces lettres verront et orront Nicolas Gascoing clerc garde du scel de la prévosté de Vernon saluz Sachent tuit que par devant nous furent présens Lorenz de Tourny et Maheut sa fame de la paroisse de Pressengny l'Orguelleus si comme il disoient et recognurent que il avoient vendu quitié et délessié à touzjours par non de vente à homes relegieus l'abbé et le couvent de Sarnay une acre de terre assise en la paroisse de Heubecourt entre Pierre de Tourny d'une part et les diz religieux d'autre aboutant au chemin le roy pour quatre livres tournois à tenir à avoir et à pourseer par droit héritage la vente dessus dite au dis relegieus et à leurs successeurs franchement quitement et em pes par dis et huit deniers parisis rendans chascun an à Johen de Gyencourt escuier à la saint Remy sanz nulle réclamance desdiz vendeurs ou de leurs hoirs à fere des ore en avant Et promistrent et jurèrent [] En tesmoing de laquele chose nous à la requeste des parties avon seelé ces lettres du seel de la prévosté de Vernon sauf le droit le roy et l'autrui Ce fu fet l'an de grace mil CC nonante et huit le vendredi feste saint Nicolas en may