Charter Document - 05030968
| Charter Number: | 05030968 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | French |
| Charter Origin: | Lay |
| Charter Type(s): | Sale |
| Date: | 1297 |
| Date type: | Internal, A.D., Feast |
| Resource Link(s): |
|
Charter:
A tous ceus qui ces présentes lettres verront et orront Nicholas Gascoing clerc garde du seel de la prévosté de Vernon salut Sachent que par devant nous fu présent Robert Dare de la parroisse de Heubecourt et recognut que il avoit vendu et otroié as hommes religieus l'abbé et le couvent des Vaus de Sarnai une pièce de terre assise en la parroisse desus dite entre la terre Robert le Desrée d'une part et la terre Jehan de Tors d'autre pour vint et cinc souls parisis à tenir et à avoir et à pourseer par droit héritage la vente desusdite asdiz religieus et à lour successours franchement quitement et em pes par sept souls tournois de rente rendant chascun an à la seint Remi à Agnès la Beluterresse sanz nulle réclamance dudit vendeeur ne de ses hoiers par reson de héritage ne par nulle autre reson des ore en avant estre fete sauf le droit au chier seigneur einz est tenu [] En tesmoing de ce nous à la requeste des parties avon seelées ces lettres du seel de la prévosté de Vernon sauf autrui droit Ce fu fet l'an de grace mil II quatre vinz et dis et sept le mardi après la Trinité