Charter Document - 05030960

A touz ceus qui ces lettres verront et orront Nicolas Gascoing clerc garde du seel de la prévosté de Vernon saluz Sachent que par devant nos furent présens Robert Loedart et Agnès sa fame et recognurent que eus avoient vendu à hommes religieus l'abbé et le couvent des Vaus de Sarney une pièche de terre asise en la paroisse de Tylly entre la terre audiz religieus d'une part et la terre Pierre Renout d'autre por quarante souz parisis à tenir à avoir et à porseer par droit héritage la vente desus dite audiz religieus et à lor sucessors franchement quitement et em pes per trois maalles tournoises rendant chascun an de rente à la Nativité seint Jehan Baptiste à Pierres le Camus de Surcy sanz nulle réclamance desdiz vendeeurs ne de lor hoirs [] Et obligèrent quant à ce lesdiz vendeeurs en contreplege eus et lor hoirs et toz lor biens muebles et non muebles présens et avenir et espiciaument une pièche de terre asise en la paroisse desusdite entre la terre au prior et au couvent de Sauceuse d'une part et la terre Mahieu le Caron d'autre à prendre et à vendre par la mein de la justise por toz les coz et les domages restorer audiz religieus et à lor sucessors s'aucun en encoroient par défaut de la garantie desdiz vendeeurs ou de lor hoirs totes les foiz que mestier en sera En tesmoing de ce nos à la requeste des parties avon seelées ces lettres du seel de la prévosté de Vernon sauf le droit le roy et l'autrui Ce fu fet l 'an de grace mil II IIII et seze le dymemche devant la Chaere seint Pierre l'apostre