Charter Document - 05030950

A touz cens [qui ces présentes] verront Guillaume de Hangest garde de la prévosté de Paris et à ce temps bailli de Cor[bueil saluz] Nous fesons à savoir que comme plet fust meuz à l'assise à Corbueil entre les bonnes gens de la ville du Coudray d'une part et le procureur de religieus hommes l'abbé et le couvent des Vaus de Sarnay d'autre part sus ce que lesdites bonnes genz c'est asavoir les persones de ladite ville du Coudray qui avoient meu le plet maintenoient et disoient contre ledit procureur que de leur droit il povoient et devoient mener leur bestes pasturer és bois desdiz religieus qui sunt appelez les bois de Boullongnel et que celui droit leur estoit acquis par longue tenue avec le titre que il allégaient et lequel titre il disoient qu'il ne vouloient point prouver et qu'il ne le convenoit pas fors que par leur foiz tant seulement Et li procureur desdiz religieus disoit que lesdites bonnes genz ne fesoient à oir et devoient du tout en tout encheoir du principal de la querelle pour ce que il allégeaient titre sus longue tenue afin de propriété acquerre et disoient qu'il n'en veuloient point prouver et disoient lesdites bonnes genz que il souffisoit alléguier et non offrir à prouver et sus ce se midrent les parties en droit Nous eu sus ce le conseil de bonnes genz ò deliberacion deismes et disons par droit en plenière assise à Corbueil le mardi après la quinzeine de Pasques en l'an de grace mil deus cenz quatre vinz et seize que pour ce que lesdites bonnes genz disoient qu'il ne vouloient prouver point de titre que par leur foiz et que il no conveneit pas que il l'offrisent à prouver que il estoient décheuz de leur querelle ne ne fesoient à oir en leur demande et assousimes et assolons lesdiz abbé et couvent à la demande desdites bonnes genz En tesmoingnage de laquele chose nous avons ceste lettre seellée de nostre seel Ce fu fet l'an et le jour desusdiz