Charter Document - 05030941

Charter Document - 05030941


Charter Number: 05030941
Cartulary Title: Cartulaire de l'Abbaye de Notre-Dame des Vaux de Cernay
Charter Language: French
Charter Origin: Religious
Charter Type(s): Recognition
Date: 1294
Date type: Internal, A.D., Feast
Resource Link(s): Cartulaires d'Île-de-France

Charter:

A touz ceus qui ces lettres verront et orront Lucas chapelain de la chapele du chastel de Vernon garde du seel de la prévosté d'icelle ville saluz Sachiez que par devant nous furent présens Guautier de Chastelneuf et Jehane sa fame et recognurent de leur bone volenté que eus avoient vendu et otroié et délessi à l'abbé et au couvent de Nostre Dame du Val de Sernay une pièce de terre assise en la parrosse de Saint Martin de Tilly entre la terre as moines de Sauceuse d'une part et d'un bout et la terre as hers Baudri le Normant d'autre pour sis livres et demie de parisis [] Et eus et leur hers sunt tenus ladite pièce de terre asdiz religieus par doze deniers parisis rendant chascun an as moines de Sauceuse à la saint Remy et deus souz au prestre de Corbie contre toute gent guarantir et défendre et guarder de touz dameges et déperz par la reson de cheste vente sauf les rentes au chief segneur Et en jura par devant nous sus les saintes ewangiles de sa bone volenté Sebire mère à ladite Jehane que en la vente desusdite par reson de héritage ne de doare ne par autre reson nule james par lie ne par autre ne vendra desorenavant Et en obligèrent ledit Guautier et Jehanne touz leurs bienz muebles et inmuebles présenz et avenir à vendre et à despendre pour touz les dameges et les déperz as diz relegieus et à leur suscessours restorer value à value totes les fois que mestier en sera se aucuns encoroient par la défaute de la guarantie desdis vendeurs ou de leur hers En tesmoig de ceu nous avons ces letres seelées du seel de la prévosté de Vernon sauf autri droit à la requeste des partiez Ce fu fet l'an de grâce mil II IIII et quatorze le dimenche après la saint Nicholas d'yver