Charter Document - 05030937

Universis presentes litteras inspecturis frater Guillermus dictus abbas Vallium Sarnaii totusque dicti loci conventus salutem in Domino sempiternam Cum lis contentio seu controversia verteretur inter nos ex una parte et religiosos viros abbatem et conventum de Morigniaco ex altera super eo quod dicti abbas et conventus de Morigniaco asserebant nos eisdem debere decimas tam de jure communi quam de consuetudine approbata et etiam titulo donacionis eisdem facte ab illustrissimis Francorum regibus de omnibus vineis terris et possessionibus quibuscumque quas in territorio de Estrichiaco habemus nobis in contrarium dicentibus et etiam asserentibus nos de decimis quarumdam vinearum nostrarum et terrarum videlicet omnium illarum que super magnum cheminum Parisiorum tune temporis habebamus absolutos esse penitus et immunes ratione cujusdam composicionis inter nos et ipsos jamdiu est facte et etiam per instrumentum publicum confirmate tandem propter bonum pacis et amicitie que inter religiosos solet et debet precipue refulgere communicato bonorum consilio et inter nos deliberatione prehabita diligenter composuimus in hunc modum videlicet quod dicti abbas et conventus de Morigniaco percipiant annuatim tempore vindemiarum in domo nostra de Estrichiaco tres modios vini in cuppa de vindemia vinee que vulgaliter dicitur vinea de Guion pro antiqua convencione inter nos et ipsos ut dictum est jam diu est facta sicut et antea faciebatur et tres alios modios in cuppa similiter de complaneto absque ingreriis et pressoragio pro nova compositione inter nos et ipsos facta tali modo quod de omnibus vineis terris et possessionibus quas tempore compositionis presentium litterarum in territorio de Estrichiaco habebamus pro supradictis sex modiis vini tam pro antiqua quam pro nova compositione super solucione decimarum simus quicti liberi et penitus immunes a quacumque ratione nostre ecclesie exsolventur Et ne in posterum lis et contencio seu controversia ratione predictarum vinearum seu possessionum renovetur predictas possessiones quas antea habebamus in dicto territorio de Estrichiaco in presenti cedula duximus nominandas tam in vigneis quam in terris videlicet vineam de Guion vineam de Perberoust vineam Renoardi super quarum decimis antiqua compositio predicta facta fuit item vineam Portarii unum arpentum vel circiter continentem vineam de Houdoer quinque quarterios vel circiter continentem terram dicti Houdoer unum arpentum cum dimidio vel circiter continentem vineam de Quoquarre duo arpenta vel circiter continentem vineas Herberti Albi Monachi quinque quarterios vel circiter continentes vineam de Egrefani quinque quarterios vel circiter continentem vineam de Bello Burgo sex arpenta vel circiter continentem et unum arpentum terre vel circiter in dicto loco situm clausum unum ab opposito domus nostre cum terris que de chanteriis dictarum vinearum fuerint extirpate et in agriculturam postea sunt redacte item dimidium arpentum terre vel circiter situm in loco qui dicitur le Larriz dimidium arpentum terre vel circiter juxta vineam Portarii unum quarterium terre vel circiter in loco qui dicitur Rondel terram de Chace Lievre terram Herberti Albi Monachi terram dicti Hure de qua terra debemus et eisdem octo denarios censuales et octo denarios augmenti census annuatim in festo sancti Remigii persolvendos quamdiu contigerit dictam terram nos tenere quod si dictam terram que fuit dicti Hure extra manum nostram ponere voluerimus quoquomodo tam nobis quam ipsis ad statum pristinum revertetur et si forte gelicidium vel aliquod infortunium in dicto territorio seu vigneis et terris predictis acciderit dictos sex modios nichilominus tenebimur solvere abbati et conventui de Morigniaco super dictis Ipsi tamen in predictis omnibus retinuerunt suam justiciam id est bannum sanguinis et latronis preterquam de nostris mancipiis et hominibus nostris in locis nostris seu domibus commorantibus et [conversis] Nos vero tenemur eisdem nomine ecclesie scilicet in viginti duobus denariis annui census et in duobus solidis pro [quarta parte] unius dreiture pro omnibus supradictis absque sexdecim denariis de terra dicti Hure superius nominata Que omnia tam censum quam dreituram in festo sancti Remigii annis singulis persolvemus In cujus rei testimonium et munimen sigillum nostrum quo unico utimur presentibus duximus apponendum Actum anno Domini millesimo ducentesimo nonagesimo quarto mense augusto