Charter Document - 05030928

A touz ceus qui ces présentes lettres verront Guillaume de Hanget garde de la prévosté de Paris salut Nous faisons assavoir que par devant nous vindrent en jugement et em propres personnes Pierres et Mathelins diz Tibers frères bouchiers de Paris clers si comme il disoient affermèrent en droit par devant nous que il avoient tenoient et pourseaient de leur propre héritage un manoir si comme il se comporte e toutes ses apartenances assis en la ville d'Aufergis lequel est appelez le manoir de Deus Mesons derechief toutes les terres arables et non arables toutes les vignes et touz les prez que il ont et pueent avoir et doivent en la devant dite ville d'Aufergis ou terrouer et és apartenances sanz riens excepter hors si comme il disoient lesqueles terres vignes et prez desus dites sont assises en pluiseurs pièces és leus qui s'ensuivent c'est assavoir la Grant Couture où ledit manoir siet et la Couture des douze arpenz et demi entre les bois Veindrin d'une part et la terre Jehan Tibout et la terre qui fu Hurteleu d'autre et aboutent as bois Veindrin et à la terre des Freisnes d'un bout et la terre qui fu Pierres du Toupin et tenanz à la terre Jehan Tibout à la terre qui fu Angaschier à la terre qui fu Symon le Cerclier à la terre qui fu Guérin Aullant à la terre qui fu au Tondu au chemin des Fourches à la terre Pierre du Toupin et Symon Loton derechief la seconde pièce est assise à la Fontene Jehan entre les terres as moines de Vaus d'une part et les bois Veindrin d'autre et aboute as bois Veindrin d'un bout et à la terre qui fu Marguerite des Forges d'autre derechief la tierce pièce de terre ò tout une pièce de pré est assise entre la terre Gieffroi Gode d'une part et le pré qui fu à la Maumariée d'autre et aboute d'un des bous as bois au mareschal de Mirepois et as aunois as moines des Vaus d'autre derechief [la quar]te pièce de terre est assise à l'Espine feu Baudoin entre la terre Gieffroy Gode d'une part et la terre qui fu feu Heudeer d'autre et aboute à la terre feu mestre Lubin d'un bout et au chemin qui va d'Aufergis a[s bois] Veindrin d'autre derechief la quinte pièce de terre est assise [] part et la terre qui fu [feu mestre] Lubin d'autre et aboute à la terre qui fu à feu Genrane d'un bout et à la terre qui fu mestre Lubin d'autre derechief la sysième pièce de terre est assise devant le manoir au seigneur entre la terre Jehan la Branche d'une part et le chemin qui va à la Borde et le chemin jouste le manoir au seigneur d'autre derechief la septième pièce est assise entre la terre Jehan le Cerclier d'une part et la terre Vallet le Bouchier d'autre et aboude d'un bout à la terre Jehan le Cerclier et à la voie des vignes d'autre derechief une pièce de pré assise à la Fontene feu Pelotier entre le pré qui fu Poilevoysin d'une part et le pré qui fu Engerranne d'autre et aboute au pré Tibaut d'Aufergis d'un bout et à la ryvière d'autre et derechief une pièce de pré assise devers les larriz tenant au pré feu Lambert d'une part et au pré as Malades d'autre aboutant à la ryvière tout en la seignorie au seigneur d'Aufergis si comme il disoit Lequel manoir terres vignes et prez desusdites les devants diz Pierres et Mathelins diz Tibers recognurent en droit par devant nous eus de leur bonnes volontés de leur commun assentement et chacun pour tout sanz division [avoir] vendu et par non de pure vente quité otroié et delessié desorendroit à touz jourz perpétuelment et héritablement à Richart dit de Yvetot escuier seigneur d'Aufergis à ses heirs et à ceus qui d'eus auront cause pour deus cenz et quarante livres de parisis [] En tesmoing de ce nous avons mis en ces lettres le seel de la prévosté de Paris l'an de grace mil deus cenz quatre vinz et treize le mardi après la Tiphainne