Charter Document - 05030912

A touz ceus qui ces présentes lettres verront Jehan de Montegni garde de la prévosté de Paris salut Nous faisons asavoir que par devant nous vint Jehan de Sarnoy escuier fuiz de monsegneur Jehan de Sarnoy chevalier et afferma que ledit monsegneur Jehan de Sarnoy son père avoit vendu et en nom de pure vente quité et otroié à touz jours à religieus hommes l'abbé et le couvent des Vaus de Sarnoy vint et sis arpenz de terre en deus pièces dont l'une pièce tient au chemin de Champ Houdri d'une part et d'autre part par devers le chemin de la Maladerie et à une autre part à la terre de monsegneur Jehan son père devant dit si comme les bournes le devisent et l'autre pièce tient au courtil de la Maladerie de Sarnoi d'une part et au bois de l'Ospital et de la Boissière d'autre laquele vente devant dite en la manière et en la fourme qu'il est contenu en une lettre faite sus ladite vente seellée du seel de la prévosté de Paris il voust gréa otroia accepta et ratefia par devant nous et promist par son leal creant que contre ne vendra par lui ne par autre en tens avenir [] En tesmoing de ce nous avons mis le scel de la prévosté de Paris en ces présentes lettres l'an de grace mil CC quatre vinz et onze en mois de may