Charter Document - 05030905

A touz ceus qui ces présentes leittres verront et orront Jehan Arrode bourjois de Paris prévost de la marcheandise de l'iaue de Paris et les eschevins di ce meesme lieu salut Nous fesons à savoir que nous voulons et otroions que relegieus hommes le prieur et le couvent des hermites de l'ordre de seint Guilliaume de Montrouge de lés Paris et leur successeurs pour eus et pour leur moutier aient et tiennent perpétuelment et poursuivent en main morte sanz contrainte de vendre ne de aliéner ne de maitre hors de leur main une leur meson assise en nostre censive et nostre jurisdicion en la rue du Fein devant la meson au moines de Sarnai joignant d'une part à la meson Jehan de Meullent bourjois de Paris et d'autre part à la meson Jehan le Flament bourjois de Paris pour vint et quatre solz parisis de crois de cens ou de perpétuel rente pour l'amorticement desus dit et pour douze deniers de fonz de terre à prendre avoir et recevoir perpétuelment chacun an au quatre termes à Paris à coutumes de nouz et de noz successeurs sur ladite meson et à paier et rendre à nous et à noz successeurs des devant diz prieur et couvent et de leur successeurs sauf toutevois perpétuelment à nous et à noz successeurs toute nostre joutice et tout nostre droit soit en criage soit en ventes se ladite meson estoit vendue ou tems à venir ou en autre quele qu'ele soit que nous avions devant ce que ces leittres furent fetes En tesmoing de ce nous avons mis en ces leittres le seel de nostre prévosté devant dite Ce fu fet l'an de grâce mil deus cenz quatre vinz et dis ou mois d'avril