Charter Document - 05030902

A touz ceus qui ces présentes lettres verront et oiront Gile du Bois le Rey clerc garde du seel aus causes establi en la chastellenie de Montfort saluz Sachent tuit que par devant mei vindrent en dreit Guillaume dit de Meuz demourant à Seint Remi et Marie sa femme et requenurent devant mei en dreit eus de commun assentement avoir quité et quitent présentement aus religieuses persones al abbé et au covent des Vaus de Sarnay des ore en dreit et touz jours mes saunz rapeler tot le dreit et tote l'action que il aveient et attendeient à avoir en quelque manère que ce fut és meubles feu Hemon le Breton et ès meubles feu Asceline père et mère de icele Marie fut par reson de descendue ou par autre reson por le pris de sis liveres de parisis et por deus coutes et por deus couissin et por cinc dras desqueles choses devant dites les devaunt diz Guilleume et Marie sa femme s'en tindrent enterinement pour poié [] Et quant à ce tenir et accomplir il de leur volenté se souzmistrent à la juridiction de la court madame la comtesse de Montfort saunz autre court avouer En tesmoing de laquele chose je Gile à la requeste des devant diz Guilleume et de Marie sa femme ei garni ces présentes lettres du scel aus causes devant dit sauf le dreit madame la comtesse de Montfort Ce fu fet en l'an de grace mil deus cenz quatre vinz et neuf le jeudi enprès la seint Martin de yver ou mois de novembre