Charter Document - 05030880

A touz ceus qui verront et orront cez presentes lestres Robert de Villepereur chevalier et madame Marie sa fame saluz en Nostre Seigneur Nous fesons à savoir à touz présenz et à venir que coume Gautier dit Chauvin et Marie sa fame eussent donné et otroié pour le remède de leur ames et de leurs devanciers en pure aumone perpétuel sanz espérance de rapeler dounoison sollempnel fete entre vis à homes religieus à l'abbé et au couvent des Vaus de Sarnoy trois souz de parisis de chiercens lesquieus estoient poiez et livrez chascun an le jor de la saint Remi des religieus devant diz audit Gautier et à ladite Marie pour une pièce de terre qui est appellée les Trente Arpenz contenant illec entour ou environ séanz ou terrouer des Esbisouers mouvanz de nostre fié de la Bretèche que nous avons acquis ensemble puis que nous fumes conjoinz par mariage lesquieus trois souz de parisis donnez audiz religieus si coume il est dit desurs voulons loons consentons coume seigneurs du fié que les devanz diz abbes et couvent et leur successeurs tiengnent poursuient pesiblement franchement et quitement en main morte à touz jours de tant coume il appartient à nous sanz contreingnement de vendre d'alienner de détroire ne de mestre hors de leur main Et quant à ladite dounoison des trois souz de parisis tenir et garder ferm et estable audiz religieus et à leur successeurs nous obligons nous et noz hoirs que nous ne vendrons encontre ne ne ferons venir par nous ne par autre et relenquissons nous et noz hoirs touz obligiez Ou tesmoig de laquele chose nous avons seellées ces présentes lestres de nos seaus Ce fu fet en l'an de grace mil deus cenz quatre vinz et cinc ou moys de juing