Charter Document - 05030878

Universis presentes litteras inspecturis frater Herveus de Villa Petrosa custos et administrator domus de Chanves et pertinenciarum seu rerum ad ipsam pertinentium salutem in Domino Noverit universitas vestra quod cum inter nos ex parte una et religiosos viros abbatem et conventum Vallium Sarnaii seu administratores rerum ejusdem monasterii tunc apud Vernonem commorantes orta fuisset discordie et dissensionis materia super eo quod dicebamus nobis deberi sexdecim solidos parisienses de quodam quarterio vinee sito in trellio de Boussart inter vineam eorumdem religiosorum ex parte una et vineam Ade Popin ex altera cujus quarterii vinee dominium capitale ad dictos religiosos dignoscitur pertinere et etiam possessio de novo in ipsos translata ipsis eisdem religiosis dictum redditum nostrum quem ab ipsis petebamus in dubium revocantibus et nobis ipsum redditum solvere nolentibus nisi de justo titulo fidem sibi faceremus pleniorem per testes vel instrumenta et hoc nobis esset grave laboriosum et difficile tandem super hoc diligenti tractatu habito a nobis hinc et inde super dicto redditu pensata utilitate domus nostre predicte de Chanves facta etiam eisdem religiosis de Sarneio plena fide potestatis et forme administracionis nobis permisse a religioso viro et discreto Guillelmo de Maalin domorum milicie Templi in Francia preceptoris superiore nostro in qua forma inter cetera plenam et expressam ac liberam habuimus potestatem tam in causis quam in negociis componendi super dicto redditu ab ipsis in dubium revocato pro utilitate nostra duximus amicabiliter componendum in hunc modum videlicet quod nos ex causis predictis a nobis pluries pensatis quittavimus dictis religiosis et eorum monasterio ac fratri Matheo tunc custodi rerum suarum apud Vernonem quicquid juris possessionis vel proprietatis habuimus seu habere potuimus in dictis sexdecim solidis et in quarterio predicto pro sex libris quas a dicto fratre Matheo nomine dictorum abbatis et conventus et eorum monasterii recepimus in pecunia numerata convertendis et ante sigillacionem presentis littere in utilitatem dicte domus nostre de Chanves a nobis conversis Et promisimus in verbo veritatis et per juramentum super hoc a nobis corporaliter prestitum et sub ypotheca rerum ad dictum locum de Chanves pertinencium quod contra dictam quittationem nunquam veniemus in futurum per nos vel per aliquos successores nostros set dictos religiosos super premissis in omnibus et per omnia conservabimus indempnes Et si forte contingeret ab aliquo successorum nostrorum contra premissa aliquid attemptari vel dictum redditum exigi ab eisdem vel dictos religiosos super hoc in aliquo molestari quod absit tenebimur ipsis religiosis reddere et restituere dictas sex libras et omnia dampna et deperdita ac expensas etiam que et quas ipsos subire facere vel incurrere continget occasione molestie vel fatigacionis si quam super hiis fieri vel moveri contingerit Et ad majorem hujus rei securitatem habendam obligamus eisdem religiosis redditus nostros et quecumque alia bona mobilia et immobilia habuimus seu habemus seu habituri sumus sub districtu prepositure Vernonis specialiter et expresse volentes et consentientes quod si a nobis vel ab aliquo successorum seu superiorum nostrorum contra premissa aliquid fieri vel non observari contingerit quod prepositus Vernonis qui pro tempore fuerit ad peticionem dictorum religiosorum possit per captionem dictorum bonorum nostrorum predicta omnia vel id in quo fuerit contra premissa attemptatum vel non observatum facere per omnia adimpleri et ipsos religiosos de Sarnaio conservare indempnes In cujus rei testimonium sigillum nostrum una cum sigillo dicte prepositure presentibus litteris voluimus et procuravimus apponi Actum anno Domini MCC octuagesimo quinto die sabbati post Pentecostem