Charter Document - 05030876
| Charter Number: | 05030876 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Lay |
| Charter Type(s): | Concession |
| Date: | 1285 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis Robertus de Baudricuria armiger et dominus ejusdem loci salutem in Domino Notum sit omnibus tam presentibus quam futuris quod ego dedi contuli et concessi ob remedium anime mee et karissimi filii mei defuncti Roberti nec non et pro salute animarum parentum et antecessorum meorum pure et simpliciter sine spe revocandi donacione facta sollempniter inter vivos viris religiosis abbati et conventui Vallium Sarnaii in perpetuum duos sextarios avene tenendos habendos et percipiendos annis singulis infra festum Omnium Sanctorum a dictis religiosis vel mandato eorumdem in domo mea de Baudricuria super omnibus bonis meis mobilibus venientibus adducentibus et existentibus in granchia domus mee antedicte cum octo sextariis avene quos dicti abbas et conventus perceperant a longo tempore super bonis meis repositis in granchia antedicta ex donacione predecessorum meorum et recipiant annuatim Quam donacionem et concessionem duorum sextariorum avene cum aliis octo predictis volo concedo et ratum habeo quod prefati religiosi teneant habeant et possideant in perpetuum in manu mortua sine coactione vendendi alienandi distrahendi vel extra manum suam ponendi pacifice et quiete Et si forte contigerit quod dicta granchia devastata sit pro aliquo infortunio ita quod bona mea non possint in eadem reponi volo laudo ac etiam approbo ut ubicumque dicta bona extiterint usque ad summam duorum predictorum sextariorum cum aliis octo prenominatis dictis religiosis penitus sint obligati et quantum ad hec tenenda et firmiter observanda me obligo et heredes meos universos et singulares relinquo totaliter obligatos In cujus rei testimonium et munimen presentes litteras sigillo meo dictis religiosis tradidi roboratas Datum anno Domini millesimo ducentesimo octogesimo quarto mense januario