Charter Document - 05030859

A toz ceus qui cels lettres verront le balli de Gysorz salut Sachent toz que devant nous vint Richeut dite la Leurdade de la Queue d'Es en la parroisse de Héricort ou tens de lors si comme elle disoit et requenut que elle de sa bonne volenté et sanz contreingnement avoit vendu et quité à perpétuité à hommes religieus et honestes l'abbé et le couvent du Val de Sernay trois pièces de terre arable séanz en la parroisse de Tilly la première pièce est à la mare du Bos enprès la terre ausdiz religieus d'une part et la terre Roberte le Leudart frère de ladite Richeut d'autre la seconde pièce est iluesques meesmes enprès les terres desdiz relegieux d'une part et d'autre la tierce pièce est enprès les terres desdiz relegieus d'une part et le chemin d'Andeli d'autre si comme ladite Richeut disoit c'est asavoir pour sept livres et dis solz parisis de quoi la devant dite Richeut se tint pour paié devant nous et jura sus les seintes évangiles que james contre ceste vente elle ne vendra ne riens de droit elle ne demandera ne ne fera demander par autre desoremes és dites trois pièces de terre vendues por cause d'éritage d'eschaete de conquest ne par autre manière quele que elle soit Mes sauf le droit au chief sires ladite Richeut guarandira et deffendra ausdiz religieus les devant dites trois pièces de terre vendues si comme elles s'estandent en lonc et en le franchement et quitement desoremes contre toz ou elle restera allieurs value à value en son propre héritage por le pris et por le reguart de bonnes genz Et quant à ce ladite Richeut obliga soi et ses hoirs et toz ses biens muebles et immeubles présenz et avenir En tesmoing de laquele chose sauf le droit le roi et l'autrui nous feimes cels lettres seeler du seel de la ballie de Gysorz Donné l'an de grace mil deus cenz quatre vinz et quatre le vendredi après Pasques au mois d'avril