Charter Document - 05030855
| Charter Number: | 05030855 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Lay |
| Charter Type(s): | Concession |
| Date: | 1283 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Universis tam presentibus quam futuris presentes litteras inspecturis Petrus de Portu tunc temporis prepositus Vernonensis salutem in Domino Noverit universitas vestra quod cum Johannes dictus Chevalier de Pormor et Amelina ejus uxor cedissent quondam et concessissent intuitu pietatis et pro salute animarum suarum religiosis viris abbati et conventui Vallium Sarnaii se et omnia bona sua mobilia et immobilia ubicumque existencia et inter alia quamdam peciam terre arabilis sitam inter terram Thome dicti l'Estormi ex una parte et terram canonicorum de Salicosa et terram dicti Gudet ex altera et dictus Johannes et dicta Amelina dictam peciam terre postea dedissent et concessissent in matrimonium Ysabelli filie dicte Ameline et filiastre dicti Johannis quam Theobaldus Carpentarius duxerat in uxorem tandem dictus Theobaldus et prefata Ysabellis ejus uxor attendentes se non habere justum initium sive justam causam dictam peciam terre detinendi cum antea dictis religiosis collata fuisset ut dictum est ipsam eamdem peciam terre et quicquid juris habebant seu habere poterant in eadem dictis religiosis quittaverunt et omnino dimiserunt coram nobis pure et simpliciter absque ulla contradictione seu reclamatione sui vel heredum suorum de cetero facienda In cujus rei testimonium sigillum prepositure Vernonis ad petitionem dictorum Theobaldi et Ysabellis ejus uxoris presenti carte dignum duximus apponendum Actum anno Domini MCC octogesimo tertio mense octobris