Charter Document - 05030835

A touz ceus qui verront ces présentes lestres nous Sedile dame de Chevreuse jadis fame de home de bon mémoire monseigneur Guillaume Maingot chevalier saluz en Nostre Seigneur Sachent tuit présenz et à venir que pour le remède de nostre ame de touz noz devanciers et de nostre seigneur devant dit icelle donnaison et icelle otreance que noustre très chier cousin monseigneur Ansel de Chevreuse chevalier sire de Mea[incourt] et Béatriz sa fame ont fete et otroiée à homes religieus à l'abbé et au couvent des Vaus de Sarnoy en pure aumone perpétuel pour le remède et le salu de leur ames donnaison sollempnel fete entre vis c'est à savoir de cent arpenz de bois si com il se comporte en lonc et en le contenanz en une pièce ovec la propriété de la donnaison et otroiance du fonz dudit bois séanz en la haie d'Evete surs l'abaie des Vaus de Sarnoy touchanz de un costé au bois de noble home monseigneur Gui de Lévies chevalier sires de Mirepois de l'autre part au bois dudit monseigneur Ansel chevalier de l'autre au bois desdiz religieus et de l'autre part au bois Jehan de Mairoles escuier lesquiex cent arpenz de bois ovec la propriété du fonz sont et sient en nostre fié et en nostre seigneurie qui est de nostre propre héritage lequel nous est devenu par raison de la succesion de noz devanciers et les tenoit en fié de nous li diz monseigneur Ansel de Chevreuse et les avoit acquis par raison d'achat si com il diseint avant qu'il fust conjoint ovec la dite Béatriz par mariage Laquele donnaison et otreance des cent arpenz du bois devant dit ovec la propriété du fonz fetes au devant diz religieus dudit monseigneur Ansel de Chevreuse chevalier et de Béatriz sa fame voulons otreons louons et consentons comme dame et seigneur du fié que li abbés et li couvenz du leu devant dit tieingnet poursuient coume leur propre héritage et leur propre demoine en main morte à touz jors pesiblement et franchement sanz coaction de vendre de detrere d'aliéner ne de mestre hors de leur main ne qu'il en puissent estre pourforciez de nous ne de noz hoirs Laquele donaison et l'otreance dudit bois ovec la propriété du fonz prometons à garantir tant com à nous apartient au diz religieus et à leur successeurs pardurablement si com il est dit desurs envers touz Et quant à ce tenir ferme et estable nous avons obligié nous et noz hoirs et touz nos successeurs Ou tesmoig de laquele chose nous avons scellées cez présentes lestres de nostre scel et baillées au diz religieus Ce fu fest en l'an de l'Incarnation Nostre Seigneur mil deus cenz quatre vinz et deus ou mois de junet