Charter Document - 05030531

Omnibus presentes litteras inspecturis G[uido] decanus ecclesie beati Martini Turonensis Hervens de Caprosia et Guido de Manlia milites salutem in Domino Notum facimus quod cum contencio verteretur inter viros religiosos abbatem et conventum Vallium Sarnaii ex una parte et nobilem virum Robertum de Poissiaco armigerum ex altera super eo quod dicti religiosi asserebant quod dictus Robertus Dei timore postposito in ipsos religiosos et eorum familiam cum suis complicibus manus inierat temere violentas ipsos atrociter verberando et ipsis alias atroces injurias inferendo dicto Roberto hoc negante et dicente quod dicti religiosi eidem injuriabantur super pressoragio quarumdam vinearum in censiva sua sitarum in loco qui dicitur le Brollat quod eidem debere denegabant et cum super premissis partes in nos compromisissent sub pena centum marcharum argenti solvendarum parti arbitrium observanti ab alia parte ab arbitrio recedente tandem post multas altercationes et assignationes dierum partes in nos compromiserunt alte et basse sub pena predicta de omnibus supradictis et ad faciendum inde nostram plenarie voluntatem Nos vero dictum nostrum seu arbitrium pronuntiamus in hunc modum videlicet quod dictus Robertus quicquid juris si quod habebat vel habere poterat quoquomodo in pressoragio supradicto de vineis in censiva sua sitis in loco qui dicitur le Brollat prout superius est expressum totum illud cedebat donabat et quitabat religiosis supradictis et dictam donationem et quitationem dictis religiosis habere faceret et tenere per se et suos im perpetuum et in pace et de ista donatione quitatione et concessione tenenda im perpetuum et observanda traderet dictis religiosis suas litteras patentes sigillo suo sigillatas In cujus rei testimonium presentes litteras sigillorum nostrorum munimine roboravimus Actum apud Sanctum Germanum in Laya die lune ante festum beati Petri ad Vincula partibus coram nobis assignatis anno Domini millesimo ducentesimo quinquagesimo tercio