Charter Document - 05020505

Innocentius episcopus servus servorum Dei dilecto filio officiali Parisiensi salutem et apostolicam benedictionem Ex parte dilectorum filiorum abbatis et conventus monasterii Vallium Sarnaii fuit propositum coram nobis quod nonnulli clerici et laici asserentes se contra eos aliquid questionis habere aliquando monachos interdum conversos et nonnunquam animalia et bona eorum monasterii pretextu cujusdam prave consuetudinis propria temeritate vadiare invadiare ac detinere presumunt donec sit eis de hujusmodi questionibus juxta ipsorum beneplacitum satisfactum quamvis jurisdictionem in eos delegatam vel ordinariam non habeant qua hoc possint Cum itaque judicialis vigor ideo sit in medio constitutus ut nemo sibi presumere audeat ultionem et ob hoc id tanquam nullo jure subnixum non sit aliquatenus tollerandum nos volentes eorum quieti consulere ac predictorum malitiis obviare auctoritate apostolica duximus districtius inhibendum ne quis occasione predicte consuetudinis eis memoratas irrogare molestias aut quecumque bona ipsorum monasterii absque juris ordine occupare vadiare seu quolibet modo detinere presumat Quocirca discretioni tue per apostolica scripta mandamus quatinus non permittas eos super hiis contra inhibitionis nostre tenorem ab aliquibus indebite molestari molestatores hujusmodi per censuram ecclesiasticam appellatione postposita compescendo Datum Lugduni VII kalendas novembris pontificatus nostri anno septimo