Charter Document - 05020458
| Charter Number: | 05020458 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1248 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Omnibus presentes literas inspecturis Johannes comes Montisfortis salutem in Domino Noverint universi quod ob remedium anime mee et predecessorum meorum de assensu et voluntate Johanne uxoris mee dedi et concessi ex nunc et in perpetuum in puram elemosinam viris abbati et conventui Vallium Sarnaii et eorum monasterio mille et sexaginta arpenta tam nemoris quam terre videlicet trecenta arpenta nemoris in Folioso et deffensis meis Acquiline et ducenta arpenta nemoris in Fontis guttulis et residuum videlicet alia quingenta et sexaginta arpenta terre sita sunt juxta nemora nominata que converti poterunt ad nemus vel ad usus necessarios et etiam dedi eis alia trecenta arpenta terre sita in uno tenenti contigua ex una parte terris dictorum monachorum granchie Sancti Benedicti et ex alia terris Veteris Ecclesie et ex alia cheminio Carnotensi ab eisdem abbate et conventu et eorum monasterio ex nunc in perpetuo tenenda cum omni jure dominio et omni justitia que in premissis habebam et possidenda libere et quiete in manu mortua absque aliquo onere censuali coustuma servicio et redibitione Et quia in dicto nemore Acquiline habeo et mihidecet et non alteri omne jus forefacti volo et concedo quod prefati monachi pro portione sua videlicet in trecentis arpentis nemoris Folosii supradicti habeant sicut et ego omne jus forefacti Et poterunt capere forefacta sua inter metas suas et sequi forefactum suum et capere usque ad rivum de Droue et usque ad cheminium Perratum et similiter in nemore suo de Polliampont et in nemore suo quod dicitur le Fay de Planeto poterunt capere forefacta et sequi et capere per totam terram meam Et quia nullus potest venari in toto nemore de Acquilina neque in circumvicinis nemoribus tamen ex speciali et mera gratia volo et concedo quod predicti religiosi vel aliqui pro ipsis in predictis nemoribus et in omnibus aliis terris sic a me vel a predecessoribus meis eisdem monachis datis et collatis possint venari ad omnes bestias et facere magnas hagas et sequi venationem et canes suos per totam terram meam ita quod venatores canes et eorum servitores non possint arrestari compelli nec cogi aliquo modo coram gruerio Acquiline neque coram aliquo judice mihi subdito ratione omnium premissorum Et quantum ad hec omnia premissa inviolabiliter observanda me et heredes meos obligo et relinquo in posterum obligatos In cujus rei testimonium presentes literas dignum duxi sigilli mei munimine roborari Actum anno Domini millesimo ducentesimo quadragesimo septimo mense martio