Charter Document - 05020218
| Charter Number: | 05020218 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1219 |
| Date type: | Internal, A.D. |
| Resource Link(s): |
|
Charter:
Universis presentes litteras inspecturis G[alterius] Dei permissione Carnotensis ecclesie minister humilis in Domino salutem Noverit universitas vestra quod significavit nobis per litteras suas Robertus de Orfino miles quod volebat pignori obligare monachis Vallium Sarnaii pro viginti libris parisiensibus quamdam decimam in parrochia de Hatunvilla sitam videlicet duos modios frumenti recipiendos annuatim infra festum Omnium Sanctorum in granchia sua de Groulu ad mensuram carnotensem et de marcio in marcium redimendos Set quia sine assensu nostro istud fieri non poterat et ipse suam nobis non poterat exhibere presenciam corporalem ut pote gravi et continua infirmitate laborans fecit quod potuit et transmisit ad nos Isabel uxorem suam et N[icholaum] filium suum primogenitum testificans nobis per litteras suas quod ratum habiturus erat quicquid ipsi de ista obligatione facerent coram nobis et quod de ista conventione tenenda fideliter in manu fratris J[oannis] dicti loci subprioris fidem prestiterat corporalem Istam igitur obligationem fecerunt in presencia nostra jam dicti I[sabel] uxor ejus et N[icholaus] filius eorum et pro ipso et pro se ipsis et quod non venirent contra conventionem istam in manu nostra fidem dederunt corporalem Preterea Symon de Vallegrinnosa miles ad cujus feodum decima pertinet prenotata istam obligationem concessit et fide corporali prestita in manu nostra se garandizaturum esse promisit Hoc etiam factum est de assensu et voluntate persone ad cujus parrochiam eadem decima pertinebat Istam igitur obligationem in nostra presencia factam approbamus et sigilli nostri munimine confirmamus Actum anno gratie MCCXIX mense maio