Charter Document - 05020134
| Charter Number: | 05020134 |
|---|---|
| Cartulary Title: | Cartulaire de l'Abbaye de Notre-Dame des Vaux de Cernay |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1206 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Raginaldus Dei gratia Carnotensis episcopus omnibus ad quos presentes littere pervenerint in Domino salutem Ad universorum noticiam volumus pervenire quod dilectus filius Gervasius de Neelpha clericus in nostra presentia constitutus decimam quamdam bladi quam in parrochia Sancti Germani de Morrevilla jure hereditario in anime sue periculum detinebat in nostris manibus spontaneus resignavit Nos vero assensu et voluntate dicti G[ervasii] clerici et dilectorum nostrorum Symonis castellani Neelphe Gaufridi et Galeranni fratrum ipsius dictam decimam abbatie Vallium Sarneii et dilectis nostris in Christo G[uidoni] abbati et monachis ibidem Deo famulantibus in perpetuam dedimus elemosinam et dictum abbatem nomine elemosine de prefata decima curavimus investire Et ut hec nostra donatio perpetuam habeat firmitatem prefatam decimam memoratis abbati et monachis Vallium confirmamus et tam presenti scripto quam sigilli nostri karactere roboramus Datum Carnoti anno Domini MCC sexto mense julio