Charter Document - 05010196

A tous ceux qui ces lettres verront Gaumain seigneur de St Quentin chevallier bailly de le comté de Clermont salut Scachent tous que Pierre le Blont et Pierre Mignot de Clermont auditeurs des lettres de leditte baillie estaublis du commandement de Monsieur de Bourbon comte de Clermont virent et leurent créanment aucunes lettres scelles du scel Monsieur Charles seigneur de Montmorency contenant la forme qui s'ensuit Trésoriers de France chers amis il plaist à moy Charle seigneur de Montmorency que nostre cher et amé frère le seigneur de Chastillon ou ses gens pour luy recoivent trois mille livres tournois qui par le Roy monseigneur m'ont esté octroyées seur l'amende des Religieux de St Leu de Serens par baillans lettres sous son scel de sa recepte a commissaire député par vous pour contraindre lesdits religieux esquelles soit contenu que nostre dit frere prenit la somme qui par luy sera receue employer en terre acheter pour ses enfans nos neveux et niesses selon la teneur d'une obligation faite entre luy et moy et de la recete que nostre dit frere fera sur ce je vous prie faire quittances pour le Roy En tesmoin de ce j'ai mis mon scel a cette cedule faite le premier jour de mars l'an de grace mil ccc xl neuf En tesmoins de ce nous a la relation desdits auditeurs faite par leurs sceaux avons ches lettres scellées du scel de laditte baillie che fut le mescredy troisième jour de décembre l'an mil ccc chinquante sept