Charter Document - 05010084

Gestorum veritatem veterum litteris iccirco mandare docuit ne subrepens oblivio jurgiorum posteris seminarium fieret Inde est quod ego Radulfus Dei gracia humilis Cluniacensis abbas presentibus et futuris notum facio quod monachi Sci Lupi de Ascerens de quibusdam militibus in eadem villa manentibus et de rusticis ejusdem ville plurimum conquerentes qui redditus et jura monachorum diminuebant et homines ejusdem monasterii verberabant et quosdam de monachis vulnerare presumpserant communicato consilio cum Rainaldo de Alta Petra venerabili viro ejusdem loci priore per concessionem totius Cluniacensis capituli ad Radulfum nobilissimum comitem de Claromonte convenerunt et pro tuenda libertate monasterii sui tales cum ipso pactiones per manum nostram firmaverunt Concessimus ei mansuram unam in villa de Esserens in propria terra Sci Lupi preter culturas ad construendam domum muratam circumdatam fossa et muro sine turri Concessimus etiam ei justicie quam habent monachi in eadem villa medietatem ita quod Comes prepositum suum quemadmodum monachi in villa habeat Si aliqua causa in villa fuerit exorta ante priorem et monachos in eorum curia tractetur comite vel ejus preposito presente et si aliquid jure justicie a causantibus exactum fuerit medietatem habeant monachi et aliam medietatem Comes Porro prepositus Comitis priori et monachis juramento obligetur et monachorum prepositus Comiti de fidelitate exactionis justicie Quorum duorum prepositorum neuter sine assensu et voluntate alterius aliquam justicie exactionem possit minuere vel aliquam facere compositionem Concessimus itidem Comiti duas minas avene per annos singulos in unaquaque domo memorate ville si aliquis habitator in ea domo fuerit servos tamen et ancillas presentes et futuros atque servientes ab hac consuetudine et omni justitia Comitis per omnia liberos esse statutum est preter quod servientes dum in servitio monachorum qui domos habeant unam tantum minam avene annuatim reddant exeuntes autem a servitio jam dictam justiciam et consuetudinem avene subeant Preterea non liceat Comiti ducere aut violenter trahere homines illius ville ad bella vel ad exercitus neque ad castra sua facienda sive reficienda vel ad aliquod opus suum munitioni tamen et defensioni hujus ville si necesse fuerit instent Retinemus etiam quod hanc concessionem Comiti vel heredi suo a comitatu Claromontis numquam in perpetuum liceat alienare Occasione autem horum que Comiti concessimus nullam potestatem super monasterium monachos conversos sive familiam domus habeat rebus omnibus usibusque et reditibus monasterii ubicumque fuerint in eo statu et libertate in qua prius fuerant permanentibus preter predicta que comiti concessimus Comes pro honore suo et utilitate monasterii forum quod in castro Credulio habebat in villa de Ascerens perpetuo celebrari constituit de cujus reditibus monachi medietatem et aliam medietatem Comes habeat in quo foro familia monachorum et proprii servientes Comitis ad usum proprium aliquid ementes nil dent jure thelonei Liceat etiam Comiti pontem lapideum facere in villa super fluvium cujus redditum Comes et monachi per medium partiantur salvo illo transitu qui per longum aque fit quem monachi ex antiquo possident et eis remanet liber et quietus Si monachi ad pontem molendinos facere voluerint cujuscunque generis sint Comes in eis nichil accipiat nec in tota aqua possit facere molendinum denique si ab his que predicta sunt Comes vel heres ejus in aliquo quod absit deviaverit commonitus atque conventus abbati vel priori Cluniacensi aut Priori domus si super hoc abbatis mandatum et litteras habuerit in curia Sci Lupi respondeat executurus que jus dictaverit Super his omnibus preordinatis fideliter observandis ipse Comes hominium nobis prestitit cum juramento Similiter inter nos et ipsum firmatum est ut singuli ejus heredes Claromontis comitatus tenentes per singulas successiones suas tam nobis quam successoribus nostris abbatibus hominium prius et statim juramentum ad hec omnia fideliter observanda faciant Quorum omnium tenorem ac firmitatem infirmari posse sub anathemate prohibemus Totum autem hoc ut ratum permaneat presentis cyrographi munimine et tam sigilli nostri auctoritate quam sigilli Sci Lupi sigillique Radulphi comitis impressione signatum est et roboratum nomina vero personarum hoc attestantium hec sunt Hugo Abbas Flaviacensis Humbertus sacrista Clun Durandus constabularius Cluniac Berengerius prior de Mondisdier Wuillelmus capellanus comitis Hugo de Anuel Rainaldus Agullun Johannes de Monte Hugo de Bosco Petrus de Pratis Symon Choisel Adam filius ejus Hugo de Vilers Giroldus et Wiardus et Odo de Credulio Actum est apud Scm Lupum Anno Verbi incarnati MCLXXV mense februarii feria quarta sexta Kl martii luna XII Regnante Rege Ludovico regni ipsius quadragesimo primo