Charter Document - 05010072
| Charter Number: | 05010072 |
|---|---|
| Cartulary Title: | La prieuré de Saint-Leu d'Esserent cartulaire (1080-1538) |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1150 - 1162 |
| Date type: | Assigned |
| Resource Link(s): |
|
Charter:
Ut tam posteris quam presentibus hujus rei series innotescat literis assignavimus quod Odo cognomine Gallus paralitice anxietatis dissolutione convictus in ecclesia beati Lupi habitum religionis induerit qui proprie libertatis arbitrio prefate concessit ecclesie duos solidos census quem in parrochia Sti Maximini possidebat et unum vini modium in clauso de Vallibus ac insuper in nemore de Boisfossa quantum lignorum duo asini singulis annis per mensem unum ad opus ecclesie absportare possent concessit eo tenore quod si asinorum adsportatio in aliquo anno dimissa remaneret in sequentis anni spatio deferretur Que res longa diuturnitate sic digesta permansit Multo post uxor Oddonis Galli Eufemia cupiditatis facibus incitata hoc esse de quantitate sue dotis asserens quod prescripsimus se concessisse negavit Quid plura Nos eam duximus in causam et coram Ivonis Belvacensis decani presentia hujus est ventilata scintilla calumnie Unde pro concordia dedimus Eufemie unum frumenti modium et sic ipsa cum marito suo Bartholomeo prius denegata concessit Sic a vero dissidens prorsus extincta est calumnia Huic concessioni affuit Theobaldus archidiaconus Odo canonicus frater Acardi Hilo nepos Bernardi canonici Tefridus de Buglis Matheus canonicus De laicis Paganus castellanus Radulfus de Praeriis Injorranus textor Drogo de Velenia villicus Sti Petri Sic est rei distincta veritas Cujus rei veritatem sigilli firmavit authoritas Paganus Vedassensis hoc scripsit tempore Henrici Belvacensis Episcopi tempore Aimeri prioris honestissimi diffinita est causa