Charter Document - 05000029
| Charter Number: | 05000029 |
|---|---|
| Cartulary Title: | Cartulaire du prieuré bénédictin de Saint-Gondon sur Loire, 866-1172 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1111 |
| Date type: | Internal, A.D., Regnal |
| Resource Link(s): |
Cartulaires d'Île-de-France |
Charter:
Cum ad omnes christiane professionis fideles juste pertinere videatur ut loca sacre religioni dicata summopere diligant edificent et augmentent precipue universos eos qui qualibet dignitate preminent merito condecet quatenus hujuscemodi devotionis vel largitatis exemplum opum attestatione studiose prebeant Porro ego Johannes ecclesie Aurelianensis episcopus et minister licet indignus hanc sententiam generalem esse intelligens quamvis eam per memet ipsum adimplere multis seculi impedientibus curis negligentius satagens duas parrochiales ecclesias dudum secularium hominum dominiis ancillatas id est ecclesiam Sancti Florentii et ecclesiam de Leon prope castrum Sancti Guldulphi sitas Deo et sancto Florentio monachisque Salmurensis monasterii omnino in perpetuum quiete et solute possidendas salva Aurellanensis matris ecclesie dignitate stabiliter dono et concedo Volumus igitur atque monemus ut prefati monachi eas de manibus secularium eripere et liberare ad laudem Dei et honorem sui monasterii disponere diligenter studeant Auctoritate etiam Dei et nostra sub pena anathematis interdicimus ne occasione aliqua quisquam successorum nostrorum sive aliorum cujuslibet ordinis contra hanc donationem nostram predictis monachis super prenominatis ecclesiis ullam omnino infestationem vel calumpniam inferat Datum Gargovii per manum Galoni episcopi monachi Sancti Florentii vii idus decembris anno incarnationis Dominice MCXI regnante Ludovico rege anno IV Signum Johannis episcopi + Signum Galonis episcopi +