Charter Document - 05000002

In nomine Dei eterni et salvatoris nostri Ihesu Christi Karlomannus gratia Dei rex Quicquid pro utilitate ac necessitate servorum Dei facere contendimus profuturum nobis ad eternam beatitudinem facilius obtinendam et presentem vitam felicius transigendam procul dubio confidimus Itaque noverit omnium sancte Dei ecclesie fidelium nostrorumque tam presentium quam et futurorum sollercia quia venerabilis vir et religiosus abbas Rodulfus monasterii Beati Florentii una cum monachis inibi Deo militantibus ad nostram accedens sublimitatem miserabile auditu lacrimabili suggestione exposuit mansuetudini nostre calamitatem prefati monasterii ceteramque miseriam ipsius regionis pro peccatis nostris ab inimicis Dei cruentissimis Normannis crudeliter sepius illatam ita ut eadem provincia quondam visu pulcherrima in solitudinis faciem penitus videatur esse redacta quare sicut et aliis incolis quondam illius plage multo magis quoque monachis sepius dicti monasterii ejusdem religiosi viri abbatis cura providendis in eodem loco [penitus] exclusa est habitatio Igitur oravit suppliciter idem venerandus abbas Rodulfus ut ad suorum refugium monachorum et ad receptionem sacratissimi corporis beati Florentii concedere sibi dignaremur cellam secus fluvium Ligerim in pago Biturigo sitam que dicitur Nobiliacus quemadmodum predecessori illius Didoni quondam abbati nos fecisse cognoscitur in qua cella sanctus Gundulfus reverenter colitur humatus quatinus a manibus suprascriptorum inimicorum Dei se evasisse exultantes requiem ibidem de tanta persecutione tandem mereantur Christo propicio invenire et in laude divine misericordie valeant respirare Nos autem supplicibus ejusdem Rodulfi abbatis monachorumque ejus precibus benignum assensum prebentes altitudinis nostre preceptum hoc fieri jussimus per quod memorata sancti Gundulfi cella cum familia utriusque sexus et rerum omnium aliarum plenitudine sepe dicto venerando abbati Rodulfo suisque habendam concedimus atque largimur videlicet ut pro nomine Domini et peccatorum nostrorum ablutione monasterium illud cum omnibus sibi pertinentibus rebus ab eodem Rodulfo reverendo abbate [et] successoribus ejus secundum regularis institutionis ordinem omnimodis agatur et sine cujuspiam contradictionis inquietudine regulariter disponatur ad utilitatem ac necessitatem servorum Dei nostris futurisque temporibus secundum sacre institutionis normam sancti Benedicti ibidem Domino servientium atque famulantium Concedimus quoque supradicto monasterio quatuor naves in omnibus aquis que in regno nostro decurrunt et licentiam navigandi sine nullo inpedimento ut nullus ministerialis ripaticum nec teloneum accipiat nec predictum cenobium pro eis ullo modo pretium persolvat Volumus denique et per nostre auctoritatis preceptum decernimus atque jubemus ut nullus judex publicus vel quislibet ex juditiaria potestate in ecclesias vel ad loca vel agros seu reliquas possessiones memorati monasterii quas moderno tempore infra dictionem regni nostri juste vel rationabiliter possidet vel que deinceps in jure ipsius monasterii voluerit divina pietas augere ad causas audiendas vel freda aut tributa exigenda aut mansiones aut paratas fatiendas vel fide jussores tollendos aut homines ejusdem monasterii tam ingenuos quam servos super terram ipsius commanentes distringendos nec ullas redibitiones requirendas nostris et futuris temporibus ingredi audeat vel ea que superius memorata sunt penitus exigere presumat sed liceat memorato abbati suisque successoribus res predicti monasterii sub em unitatis nostre defensione quieto ordine possidere Placuit namque nostre celsitudini regia decernente auctoritate qualiter constitueremus prefato loco privilegium per preceptum nostre auctoritatis si quid infringere de supradictis quispiam visus fuerit unquam sexcentorum solidorum inmunitatem rectoribus ejusdem loci exsolvere cogatur Et quicquid exinde fiscus noster sperare poterat totum nos pro eterna remuneratione prefato monasterio concedimus ut in alimonia pauperum et stipendia monachorum ibidem Deo famulantium proficiat perhennibus temporibus in augmentum Et quando quidem divina vocatione supradictus abba vel ceteri subsequentes de hac luce migraverint ipsi monachi ibidem Deo famulantes per nostram permissionem et consensum juxta ordinem et regulam beati Benedicti ex sese licentiam eligendi habeant semper abbatem quatenus servos Dei qui ibidem Deo famulantur pro avo patre pro nobis nostrique generis prosapie atque stabilitate totius regni nostri conservandi jugiter Dominum exorare delectet Advocatum quem recte elegerint habeant et ob remunerationem nostri tortum ei omne dimittimus Ut autem nostre munificentie auctoritas firmior habeatur et per futura tempora diligenter conservetur manu propria subter eam firmavimus et anulo nostro insigniri [jussimus] Signum Karlomanni gloriosissimi regis Nerbertus notarius ad vicem Wlfardi recognovit Datum nonis junii anno tercio regni Karlomanni gloriosissimi regis indictione XIII Actum apud Pauliacum vicum feliciter amen Hugo venerabilis abba hoc ambassiavit