Charter Document - 04980057

L'an MCCCXXXVII presens le sousprieur d'Angy Jehan Bonjour et plusieurs autres Mrs Regnault curé de Fleurines Geoffroy Langlois et plusieurs autres Thomas Freret Symon de la fontaine Jehan Capperon Thomas Paillart lesquels et chacun d'eux singulierement ont cogneu et confessé souffisament par devant nous en jugement que ils avoient etez et allé au bois de Mr Saint Christophe lequel appartient a luy comme son domaine auquel aucun n'est tenu ne peut aller pour coupper prendre ou emporter arbres verds sans son congié ou seing fait par Mr le Prieur dessusdit et quiconque sest trouvé ou ait fait le contraire ou ait prins abattu couppé ou devantdits bois sans être seigné a l'enseingne ou seing de Mr ou par son congié ou de ses gens a ce avoir fait il chiet en l'offense lesquels ce nonobstant estoient allez audit bois et avoient couppé et abattu et levé deux grands saulx verds sans ce qu'il apparu d'aucun seing mis en fait par Mr ou ses gens ou qu'ils sceussent que lesdits arbres eussent etez seignez [] pourquoi nous les avons condamnés et chacun singulierement a nous amender l'offence et meffait dessusdits en jugement Et par ce par iceluy appert clairement que ledit prieur de Saint Christophe a toutte justice en sa terre et seigneurie et mesmement es bois de Saint Christophe et ainsy il en peut disposer comme hault justicier a son prouffit et utilité sans ce que le Roy notre sire y puisse pretendre aucun droit ce que de sa ditte justice et seigneurie lesdits predecesseurs en ont toujours jouis et possessé