Charter Document - 04971024

Nous Guy de Léviz mareschal de Mirepois chevalier et je Ysabel sa femme à tous ceus qui ces présentes lettres verront et orront salut en Nostre Seigneur Nous fesons à savoir à tous que nous de nostre bonne volenté et de nostre quemun assentement attendanz nostre proufit et nostre honneur avons donné Jehanne nostre ainsnée fille en mariage à noble homme Mahiu seigneur de Montmorency chevalier o tout quatre cenz livrées de terre à tournois pour ledit mariage faire dudit Mahiu et à emplir Lesqueles quatre cenz livrées de terre nous asséons au devant dit Mahiu en ceste manière qui sensuit C'est assavoir en nostre ville qui est dite Achères en diocèse de Chartres o toutes les appartenances de celle mesme ville [] Et donons encore et otroions audit Mahiu pour ledit mariage faire avesques nostre dite fille neuf mille livres de bons tournois desquels ledit Mahiu pourra faire sa volenté [] En tesmoin desqueles choses toutes et chacunes d'icelles si comme elles sont pardessus devisées nous devant diz Guy et Ysabel avons donné audit Mahiu ces présentes lettres confermées par le garnissement de nos propres seaulx Et prions encore et requérons nos amés amis Thiébaut de Marly et Jehan de Bruières Ansel de l'Isle seigneur de Bourriz et Jehan de Ourmoy chevaliers que ils s'establissent principaux déteurs et rendeurs chascuns pour le tout à emplisseeurs et entérineeurs de toutes les choses dessus dites et de chacunes d'icelles si comme elles sont desus devisées envers ledit Mahiu pour nous [] Fait l'an de grace mil deus cens soissante dissept ou mois de mars Seellé de cinq seaux dont le premier est de Guy de Lévis ayant en l'escusson trois chevrons et au contreseel un lyon rampant à la queue fourchée le second d'Ysabeau sa femme tenant un oyseau sur le poin à ses deux costez deux aiglettes et au revers une croix avec quatre aiglettes qui est de Marly Le troisiesme tombé estoit celuy de Thibaut de Marly le quatriesme de Jean d'Ourmoy ayant un lyon en l'escusson Le cinquiesme d'Ansel de l'Isle où se void une fasce accompagnée de sept merlettes quatre en chef et trois en pointe à un lambel de cinq pièces