Charter Document - 04971020

Inquesta facta per Guidonem Narbonensem archiepiscopum de mandato domini regis et de assensu parcium inter Guiotum marescallum de Mirapiscis et Berengarium de Podio Sorigario militem ad sciendum utrum Berengarius de Podio Soriguario defunctus pater istius Berengarii qui nunc agit terram de Florensiaco et de Pomerolio sitam in episcopatu Aguatensi quorum possessionem petit iste Berengarius amiserit in generali guerra quam defunctus Simon comes Montisfortis fecit auctoritate apostolica in episcopatu predicto et locis vicinis pro hereticis et eorum fautoribus extirpandis Item utrum comes Montisfortis seu Guido de Leviis avus istius Guioti et pater ejusdem Guioti tenuerunt et possiderunt dictam terram sic predictam Item per quantum tempus Item utrum avus et pater istius Guioti fuerunt in homagio regis de dicta terra Item curia Romana confirmaverit dicto comiti dictas terras sic amissas Item utrum dictus comes avus vel pater ipsius Guioti fuerunt ejecti a saisina dicte terre Item quomodo et per quem et a quo tempore Item si amiserint quomodo recuperaverunt et a quo tempore Item inquirendum est utrum Berengarius pater istius Berengarii qui nunc agit fuerit in saisina dicte terre existens in bona pace cum ecclesia et domino rege et qualiter acquisivit dictam saisinam et quo tempore et per quantum tempus fuit in ea Item quis amovit eum a dicta saisina et quomodo fuit amotus et quot sunt anni quod fuerit amotus quia constat tam per confessionem dicti Berengarii quam per testes quod idem Berengarius per violenciam recuperavit a patre dicti Guioti in ultima guerra quam habuit comes Tholose contra dominum regem in qua idem Berengarius fuit contra regem cum dicto comite et valitoribus ejus possessionem medietatis castri et ville de Florenciaco et totius castri de Pomerolio Aguadensis diocesis quibus dicebat patrem suum spoliatum fuisse non violenciam ab avo dicti Guioti que petebat ab eodem Guioto sibi reddi absolutus est dictus Guiotus ab impeticione ipsius Berengarii