Charter Document - 04971007

A tous ceulx qui ces présentes verront Philippe archidiacre du Pincerais salut Je veux et entends que vous soyez advertiz qu'en considération de la piété et amour de Dieu j'ay donné en aulmosne à tousjours sur la dixme de Maurepast que j'avois acquise de Guillaume de Maurepast mon cousin paternel demy muid de bled [trois septiers de godriolle et trois septiers d'avoyne] aux religieuses de Saint Remy des Saulx plus demy muid de bled [trois septiers dudit grain et trois septiers dudit avoyne] aux religieuses de Saint Chorentin du consentement de Mre Pierre de Richebourg du fief duquel ladite dixme est dépendante le tout de l'adveu et consentement de Anne espouse dudit de Richebourg et de Guidon leur filz Et en tesmoing de mon aulmosne faicte ausdictes religieuses j'ay faict apposer mon sceau à ces présentes lettres et j'ay supplié monseigneur Regnault évesque de Chartres de confirmer de l'apposition de son sceau la teneur desdictes présentes suyvant le contenu des lettres que lesdictes religieuses ont desja receues de moy et dudict Mre Pierre de Richebourg Lesquelles en récompense de ce bien faict seront tenues de faire dire et célébrer tous les ans spéciallement une messe du Saint Esprit à mon intention tandis que je serai vivant et une annuelle à mon décedz Donnée au moys de janvier en l'an de l'incarnation Nostre Seigneur MCCXII