Charter Document - 04970050
| Charter Number: | 04970050 |
|---|---|
| Cartulary Title: | Cartulaire de l'Abbaye de Notre-Dame de La Roche |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1240 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Universis presentes litteras inspecturis G permissione divina ecclesie Parisiensis minister indignus eternam in Domino salutem Notum facimus quod in nostra presencia constitutus Guido Chevrel miles et Beatrix ejus uxor recognoverunt se vendidisse abbatie de Roscha pro sexaginta libris Parisiensibus suis quitis quatuor arpenta prati siti ad Capellam juxta Caprosiam in censiva capellanie antedicte ad quindecim denarios censuales ut dicebant et promiserunt fide in manu nostra prestita corporali quod dictam venditionem abbati et conventui de Roscha garantizabunt contra omnes ad usus et consuetudines Francie et quod de cetero contra dictam venditionem per se sive per alium non venient Memorata quoque Beatrix quitavit expresse coram nobis quicquid in dictis pratis habebat vel habere poterat jure hereditario sive ratione dotalicii seu quocunque alio modo spontanea sub prestite fidei religione Preterea Adam capellanus dicte Capellanie juxta Caprosiam de cujus capitali censu dicta prata movebant de assensu et voluntate nostra voluit et concessit quod abbatia de Roscha dicta prata de cetero possideat in manu mortua sine coactione distrahendi salvis tamen sibi et successoribus suis in dicta capella quindecim denariis censualibus supradictis Item dictus Guido Chevrel tenetur et promisit sub fide prestita se assignaturum et liberaturum in manu mortua dicte Ade vel ejus successoribus si interim ipsum mori contigerit unum sextarium bladi mosturangii ad valorem siliginis ad minus in molendino suo de Capella sive in molendino suo de Bequencort alioquin teneretur solvere dicto capellano decem libras Parisienses idem Guido videlicet nisi infra festum beati Remigii proximo venturum procuraret et faceret tantum erga dominos feodi quod dictus sextarius bladi in manu mortua possideretur Nos vero pensata in hoc utilitate capellanie antedicte predictam venditionem in manu mortua ut dictum est factam volumus et eam potestate ordinaria quantum in nobis est confirmamus Quod ut ratum permaneat presentes litteras sigillo nostro fecimus roborari Actum anno Domini MCC quadragesimo mense aprili