Charter Document - 04970028
| Charter Number: | 04970028 |
|---|---|
| Cartulary Title: | Cartulaire de l'Abbaye de Notre-Dame de La Roche |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1248 |
| Date type: | Internal, A.D. |
| Resource Link(s): |
Cartulaires d'Île-de-France |
Charter:
Ego Johannes de Nantolio miles dominus de Levies notum facio universis presentes litteras inspecturis quod ego post decessum meum assensu et voluntate Margarete uxoris mee pro salute anime mee et eciam uxoris mee dedi in puram elemosinam ecclesie Beate Marie de Roscha super quinto meo sexaginta solidos Parisienses in censu meo de Levies in festo sancti Remigii singulis annis percipiendos tali modo quod si heredes mei predictos sexaginta solidos jure hereditario vellent retrahere jam dicte ecclesie sexaginta libras Parisienses persolvere tenerentur Preterea volo et concedo quod jam dicta ecclesia de cetero habeat et possideat pacifice quoddam stannum situm in valle prope nemus Sancti Dyonisii quod nemus situm est inter abbaciam de Roscha et Bellam Pennam et duo arpenta tam terre quam prati prope ortum jam dicte ecclesie sita que domina Isabella de Levies jam dicte ecclesie in puram et perpetuam elemosinam quondam contulit et concessit salvo tamen obolo censuali a jam dicta ecclesia michi et heredibus meis annuatim persolvendo Preterea sciendum est quod fratres predicte ecclesie nec per se nec per alium piscari poterunt in rivo qui defluit inter stannum meum et stannum eorum Abbas vero et conventus jam dicte ecclesie de Roscha caritative in omnibus beneficiis que in eadem ecclesia fient de cetero me et uxorem meam tam in vita quam in morte receperunt et me specialiter in missa de Spiritu Sancto que in sepe dicta ecclesia singulis ebdomadis celebratur habebant commendatam post decessum vero meum in omnibus missis que cotidie per Dei gratiam in dicta ecclesia pro defunctis celebrabuntur mei memoriam habere specialiter tenebuntur Quod ut ratum et firmum permaneat presentem paginam sigilli mei munimine roboravi Datum anno Domini MCC quadragesimo VIII mense julio