Charter Document - 04941001
| Charter Number: | 04941001 |
|---|---|
| Cartulary Title: | Cartulaire de l'Hôtel-Dieu de Pontoise |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1190 |
| Date type: | Internal, A.D. |
| Resource Link(s): |
|
Charter:
Notum sit omnibus tam futuris quam presentibus quod Ego Philippus frater Mathei comitis Bellimontis dedi et in perpetuam eleemosinam concessi ecclesie Sancte Marie de Valle omnem justiciam domus quam Adam Clericus de Campaniis eidem ecclesie contulerat cum masura eidem domui adjacente et arpenno nemoris in costumis ad eamdem domum pertinente eo tenore quod si fratres vel servientes illius ecclesie homicidium vel furtum sive crimen aliquod super quo irretiri debeant in eadem domo vel in masura sua [quod absit] perpetraverint tunc abbas omnem justiciam habebit Si vero alienigena sive adventitius aliquis qui ad jurisdictionem jam dicte Ecclesie non pertineat aliquod supradictorum facinorum vel ipsis consimilium in domo illa commiserit tunc justicia mea erit Et sciendum quod pretaxatam domum prefate ecclesie in perpetuum possidendam concessi liberam a foragio rotagio talliis corveis omnibus consuetudinibus et exactionibus tali tamen conditione quod eadem Ecclesia quatuordecim denarios Belvacensis monete nomine census et unam minam avene singulis annis quamdiu vixero mihi nihil hominus persolvet Qui quidem census et mina avene post obitum meum eidem ecclesie pro salute anime mee remanebit Hujus rei testes fuerunt Theobaldus de Ronkerolis Theobaldus de Campanis Balduinus decanus de Joiaco Adam presbiter de Campaniis et Garinus Maior Quod ut ratum et inviolabile permaneat presentem cartam conscribi et sigilli mei impressione feci roborari Actum publice anno ab Incarnatione Domini millesimo centesimo nonagesimo