Charter Document - 04940146

Comme nous Guillaume de la Fontene mere prevost et voiés de la commune de Pontoise avec aucuns de nostre conseil eussions trouvé le crieur de l'Ostel Dieu de Pontoise prenant por havage de chascune charretee de buche qui estoit amenée por vendre dehors au marchié de Pontoise une buche et porce que nous adonques ne estions en aucune chose certainz ne enformés du droit que ceus dudit Ostel Dieu avoient en ce nous eussions en ce geté nostre main et ce que ledit prieur en avoit pris et levé eussions fait mettre en nostre main jusque a ce que nous feussions du droit que ceus dudit Ostel Dieu i devoient avoir souffisamment enformés sachent touz que le vendredi devant feste Saint Lorenz lan de grace mil ccc et sis appelez avec nous bones genz dignes de foi de nostre conseil c'est assavoir Jehan le Minier Guillaume de Veilly et pluseurs autres nous feumes enformés a plain par les sermenz de pluseurs bones gens dignes de foi jurez par devant nous et diligament examinez que ceus dudit Ostel Dieu devoient avoir por reson du havage de chascune charretée de buche que lon ameine dehors por vendre ou marchié de Pontoise une buche et que de ce ils avoient usé de lonctemps pesiblement Pourquoi nous audit arrest ostemes nostre main et leur rendimes et restablimes ce que nous avions pris et tenions en nostre main En tesmoing de ce nous avons signé ceste presente copie de nos registres du seel de ladite commune as causes lan et le jour de vendredi desus diz