Charter Document - 04940144

A tous ceus qui ces presentes lettres verront Guillaume de Velly mere prevost et voier de la comune de Pontoise salut Come descort feust entre le prieur et le couvent de Sainte Honorine de Conflans de une part et le prieur la prieuse les freres et les sereurs de l'Ostel Dieu de Pontoise dautre part et plet meu pardevant nous entre lesdites parties sus ce que chacune de icelles disoit et maintenoit une maison veue et monstrée mouvoir et estre tenue de eus à chef cens annuel laquelle meson fu et estoit Agnes la Poullallere du temps que ele vivoit et en icele demouroit et habitoit laquele meson est seant en la rue Sainte Honorine à Pontoise et laquele meson apres le deces de la dite Agnes eschei et vint a religieus homes et honestes l'Abbé et le couvent de Saint Martin de Pontoise et laquele meson lesdiz abbé et couvent vendirent a mestre Richart de Benignicourt mareschal nostre Seigneur le Roy ou temps que il vivoit Et disoient lesdiz prieur et couvent de Sainte Honorine eus avoir sis deniers et maille de annuel chef cens sur ledit liu contencieus chascun an a la Saint Remi et que il estoient en bonne sesine de avoir eu amendes pour la reson dudit chef cens non poié a jour nomé et de touz les cas qui a seigneurie appartiennent toutes fois que il sisunt offert et que il ont eue et gardée ceste sesine par lespace de vint ans de trente ans et de plus et par tant de temps que il leur doit valoir a sesine et a proprieté et que de ce est comune renomée Lesdiz prieur prieuse freres et sereurs de l'Ostel Dieu desusdiz disanz et maintenant quil estoient et avoient esté en bonne sesine par eus et par leurs devanciers comme seigneurs tresfonciers de avoir et recevoir sept deniers et un tournois de chef cens sus ladite meson contencieuse par un an par deus ans et par tant de temps que bonne sesine leur doit estre acquise et que ceste sesine il ont gardee et continuee sus ceus qui ladite Meson ont tenue par le temps dessus dit pesiblement et que de tous esplois qui puis le temps desusdit sunt avenus du liu contencieus appartenanz a seigneurs chevetains qui a leur congnoissance sont venus il ont esploitié come seigneur et que le chef cens dudit liu contencieus fu jadis Raoul de Pierrelée et Emeline sa fame et de ce usa ledit Raoul par son temps come seigneur tresfoncier et que ledit Raoul et sa fame donnerent le chef cens de la dite meson a ceus de la dite Meson Dieu en aumosne et que ce tiennent ceus dudit Ostel Dieu par point de chartre et ont lettre de l'amortissement des seigneurs de qui ce muet en fié et que de ce est comune renomée Sus ce de l'une partie et de l'autre ices tesmoins jurés diligamment examinés les depositions de iceus mises en en escript veues et diligamment regardees leues et ois deus peres de lettres que ceus dudit Ostel Dieu aporterent en jugement a conforter leur entencion et la deposicion de leurs tesmoins oi et entendu diligamment tout ce que les dites parties voudrent dire et proposer et consideré tout ce qui de droit et de coustume nous povoient et devoient a la cognoissance de la verité de la dite cause esmouvoir en conseil et deliberacion sus ce avec les sages et especialment avec ceus de notre conseil A la parfin l'an de grace mil trois cenz et trois le vendredi apres les Brandons laquele journée estoit assignee as dites parties par devant nous a oir droit [] Nous meus de droit et par conseil de lassentement et de lacort de nos compaingnons et des jurés de notre conseil pronunciemes par droit ledit liu contencieus estre tenu a chef cens de chascune des dites parties [] mes pour ce que nous ne feusmes en aucun certain enfourmés de la desevrance ou de la separacion desdites deus seigneuries et demourames et feusmes incertains de la value de chascune de icelles nous dismes et pronunciemes come devant que chascune desdites deus parties auroit la moitié des ventes dudit liu contencieus Et a ce present jugement de droit fere et pronuncier furent presenz avec nous Raoul Messent Jehan de la Fonteine Pierre Messent Jehan le Jonne drapier Jehan le Minier Jehan le Jonne de la grant rue Nicolas de la Fonteine Jehan de Mellou Guillaume de la Ruele Richart Abatbos Girart le Piquart Druie de Cormeilles Guillaume Sequart Liefroy Abatbos Jehan le Feron Jehan le Cordouennier Jehan Lengles Thomas Aupouce et Estienne de la Fonteine En tesmoing de ce nous avons ce present memorial scellé du scel de ladite comune as causes l'an et le jour desus diz