Charter Document - 04940105

A tous ceus qui ces presentes lettres verront et orront Le mere et li per de la commune de Pontoise ci desouz noumez salut Sachent tuit que come contenz fut meu entre ceus de la Meson Dieu de Pontoise dune part et les tenneurs de la ville de Pontoise de lautre part par la reson dun fossé qui est entre le pré qui fu au mire de Bouconviller et le fresche des diz tenneurs Lequel fossé aboutit au ru par desouz et a la porte qui est par desurs Lequel contens dudit fossé est apesié entre les parties devant dites de leur acort pes fete et ordenee dice contens par conseil de bouennes gens En tele maniere que le fossé demourast ou point et en l [estat] que il estoit au jour et a leure que ceste letre fu fete sans croistre et sans apeticier si comme les bonnes se comportent tout contreval du mur qui est devant ladite porte tresques au ru qui est par desouz qui chiet en Oise Laquele porte doit demourer ou liu ou elle est a tous jour desore en avant et la voie auxi qui est devant la porte [] Et est a savoir que si ceus de la Meson Dieu ont afere et besoig doudit fossé au tans avenir pour aucun cas quel que il soit ou que il leur plaise ils pourront user dudit fossé pour leur besoig et le pouront rompre et fere curer et aparellier à leur [gré] sans contredit de lautre partie mes que le fossé demeure en autel point de léeur et de longueur comme il estoit devant [] Et se les bonnes lequeles sont en la terre des des diz tenneurs fondoient ou chéoient oudit fosse ices dis tenneurs seroient tenu a oster les dudit fossé et de remettre les oudit estat a leur cout Apres il est à savoir que les saus et le plantin qui sunt et seront desore en avant entour le fossé qui est entre le moulin de Bicherel et le mur du freche lesquels saus et plantin sont a ladite Meson Dieu seront coupé et doivent estre coupé de troiz en troiz ans [] en tel maniere que ce qui demoura audit fossé de plantin ne doit avoir que un pié de haut par desur le mur qui est devant ladite porte et devant ledit plantin [] Laquele pes ordonée dice contens devant dit le mestre la prieuse li freres et les sereurs de la Meson Dieu devant dite u nom de leur meson et pour eus dune part Ancoul dit Abbabos Jehan de la Fontaigne et Thiebaut de Hennouville prevoz des diz tenneurs en ce tans u nom de la communeté dices tenneurs et pour eus de lautre part establis par devant nous promindrent a tenir en droit a tourjous [] Nous a la requeste des parties devant dites pour bien de pes et pour leur profit avons seellé deus peres de lettres semblables du sel de la commune de Pontoise au causes [] Ce fu fet pardevant Druie le Jouenne en ce tans mere et par devant ses compaignons per cest a savoir Herviu de Pierrelée Renaut Lemperere et autres assés En lan de grace mil deus cens quatre vins et set ou mois octembre